بيىلعى جىلى قازاقستاندا دەنساۋلىق ساقتاۋ سالاسىنا 600 ميلليارد تەڭگە ءبولىندى

 بۇل تۋرالى بۇگىن ق ر پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن بريفينگتە ق ر دەنساۋلىق ساقتاۋ جانە الەۋمەتتىك قورعاۋ ءمينيسترى تامارا دۇيسەنوۆا ءمالىم ەتتى.

 «دەنساۋلىق ساقتاۋ جۇيەسىن جاڭعىرتۋ ماسەلەسىنە قاتىستى ايتار بولسام، اعىمداعى جىلى «سالاماتتى قازاقستان» باعدارلاماسى اياقتالادى. ونىڭ ەكىنشى كەزەڭىن ازىرلەۋگە كىرىستىك. ول اياقتالاتىن باعدارلامانىڭ جالعاسى بولماق»، - دەدى ول.

 ءمينيستردىڭ ايتۋىنشا، اتالعان باعدارلامانىڭ جاڭا ەكىنشى كەزەڭىندە جۇمىستار 4 باعىت بويىنشا جۇرگىزىلەدى.

«بىرىنشىدەن، مەديسينالىق ساقتاندىرۋ جۇيەسى ەنگىزىلەدى. ياعني، جۇمىس بەرۋشى مەن جۇمىسشى اراسىنداعى دەنساۋلىق ساقتاۋعا ىنتىماقتاستىق جاۋاپكەرشىلىك قامتاماسىز ەتىلەدى. الەۋمەتتىك مەديتسينالىق ساقتاندىرۋ جۇيەسى قورىنا قاتىستى ايتار بولسام، ەستەرىڭىزدە بولسا، مەملەكەت باسشىسى بىزدەرگە 2017 - جىلدىڭ 1 - قاڭتارىنان بۇل جۇيەنى ەنگىزۋدى تاپسىرعان ەدى. سوندىقتان، قازىردىڭ وزىندە مينيسترلىك وتاندىق ساراپشىلاردى تارتا وتىرىپ جۇمىس توبىن قۇردى»، - دەدى ول.

 ونىڭ اتاپ وتۋىنشە، ەكىنشىدەن، العاشقى مەديسينالىق- سانيتارلىق كومەك دامىتىلاتىن بولادى. ءۇشىنشى جانە ءتورتىنشى باعىتتاردا مەديتسينالىق كادرلارعا ءبىلىم بەرۋ جانە ولاردى دايىنداۋ جۇيەسىن جەتىلدىرۋ، دەنساۋلىق ساقتاۋ سالاسىن باسقارۋ جۇيەسىن ەنگىزۋ كوزدەلەدى.

 «قازىرگى ۋاقىتتا بارلىق باعىتتار بويىنشا جۇمىس توپتارى قۇرىلدى»، - دەدى ت. دۇيسەنوۆا.

 اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى