سولتۇستىك قازاقستاندا 600 مىڭ گەكتار استىق القابى قار استىندا قالدى

شىعىنعا شاش ەتەكتەن باتقان ديقاندار كومەك سۇراۋدا. يۋريي يۆانوۆتىڭ ەسىل ەڭبەگى ەش كەتتى. ديقاننىڭ ەگىنى كەش ءپىسىپ، قاراشانىڭ قارىندا قالدى. شىعىنعا باتقان شارۋا ەندى نە جۇمىسشىلارىنىڭ ايلىعىن، نە العان نەسيەسىن تولەرىن بىلمەي دال. ساقتاندىرۋ كومپانيالارىنان دا قايران بولماي تۇر.

 يۋريي يۆانوۆ، شارۋاشىلىق باسشىسى:

 - بۇگىن وراق ناۋقانىن تولىق توقتاتتىق. ساقتاندىرۋ كومپانياسىنا جۇگىندىك. ولار ءبىزدى گيدرومەت ورتالىعىنا جىبەردى. سينوپتيكتەر بولسا جاعدايدى كوزبەن كورمەستەن، «اۋا- رايى اشىق» دەگەن قاعاز بەردى. بۇلارى اقىلعا قونبايتىن شەشىم. قالىڭ قاردىڭ استىندا قالعان ەگىندى ورۋ مۇمكىن بولماي تۇر. ماسەلەن، مىنا ءبىر القاپتىڭ بەرەكەلىگى 30 سەنتنەردەن اينالۋدا. الايدا مۇنىڭ بارلىعى كوكتەمگە دەيىن دالادا قالۋى مۇمكىن.

جاۋىن- شاشىننان شارشاعان شارۋالار كۇننىڭ سۋىعىنا يەك ارتقان. الايدا العاشقى ايازداردا جانار- جاعارمايلارى قاتىپ، كومبايندار توقتاپ قالدى. وتالعانداردىڭ دا جۇرۋىنەن تۇرۋى كوپ. ويتكەنى، استىق دىمقىل، ورىلمايدى.

بەيبىت قابدۋوۆ:

- كومبايندى وتالدىرۋ ءۇشىن تاڭەرتەڭ 2-3 ساعات قاجەت. سوسىن القاپقا بارامىز. مىنە، كۇندىزگى 12دە شىقتىق، 3 اق ساعات جۇمىس ىستەدىك. اۋا- رايى مۇمكىندىك بەرمەيدى. كۇندە وسى. قازان ايىندا القاپقا 5 اق رەت شىقتىق.

 شارۋا اۋدان اكىمىنە حات جازعان. ەندى سول بويىنشا ارنايى كوميسسيا قۇرىلىپ، شىعىندى ساقتاندىرۋ كومپانياسى وتەپ بەرۋى ءتيىس.

جامبىل اۋدانىنىڭ اكىمى:

- زاڭعا سايكەس كەلىپ تۇسكەن ارىز بويىنشا 5 كۇندە كوميسسيا قۇرىلادى. قازىرگى ۋاقىتتا وسى جونىندەگى قاۋلىعا قول قويدىم. ارنايى توپ مۇشەلەرى ساقتاندىرۋ كومپانياسىمەن بىرگە اۋا- رايىنان زارداپ شەككەن القاپتارعا شىعىپ، شىعىن مولشەرىن انىقتايتىن بولادى.

شەنەۋنىكتەردىڭ سوڭعى ساندارىنا سەنسەك، سولتۇستىك قازاقستاندا ەگىننىڭ 81 پايىزى جينالعان. ال شارۋالار ءالى دە ىرىس ءدانىن ىسىراپ ەتپەۋدىڭ قامىمەن ءجۇر. www.24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى