پاۆلوداردا 600 گە جۋىق نىساننىڭ كوشە اتاۋىندا 80 قاتە انىقتالدى
بۇل تۋرالى تىلدەردى دامىتۋ ءبولىمىنىڭ سەكتور مەڭگەرۋشىسى مەيرام نۇعىمان جۋرناليستەرگە بەرگەن سۇحباتىندا ءمالىم ەتتى، دەپ حابارلايدى قازاقپارات pavlodarnews.kz سايتىنا سىلتەمە جاساپ.
«ءبىزدىڭ سەكتور قالا كوشەلەرىندەگى مەملەكەتتىك ءتىلدىڭ ساقتالۋى مەن كورنەكى اقپاراتتىڭ دۇرىس جازىلۋىن باقىلايدى. ونىڭ ىشىندە كوشە اتاۋلارى جازىلعان تاقتايشالار دا كىرەدى. اي سايىن بەلگىلەنگەن كوشەلەردى قارايمىز. وكىنىشكە وراي، مۇنداي قاتەلەر تۋرالى ءجيى ايتىلادى. تۇرعىندار تەلەفون شالىپ جاتسا، سول جەرگە شىعىپ، سۋرەتكە ءتۇسىرىپ الامىز. ەگەر دە جەكەمەنشىك كاسىپورىنعا تيەسىلى بولسا، تۇزەتۋىن تالاپ ەتەمىز. تۇرعىن ءۇي بولسا، تۇرعىن ءۇي كووپەراتيۆى جانە پاتەر يەلەرى كووپەراتيۆتەرىمەن جۇمىس ىستەيمىز. وسىدان ەكى جىل بۇرىن سۇراعانوۆ كوشەسى اشىلعانىن بىلەسىزدەر. سول كوشەدەگى عيماراتتار مەن جەكەمەنشىك مەكەمەلەرگە، ۇكىمەتتىك ەمەس ۇيىمدارعا، تۇرعىن ۇيلەرگە ءبىر تىلدە جانە بەلگىلەنگەن فورماتتا تاقتايشالار شىعاردىق. قالالىق اكىمدىكتىڭ تاپسىرىسى بويىنشا تۇكش بولىمىمەن بىرگە ەسكيزىن كەلىسىپ، تەكسەرۋدەن وتكىزگەننەن كەيىن ورناتتىق. ال ودان كەيىن سالىنعان نەمەسە قايتا قۇرۋ جۇمىستارىن جۇرگىزگەن نىساندار وزدەرى تاپسىرىس بەرىپ، قاتەلىككە ۇرىنىپ جاتادى. بۇل جاعدايدى مىندەتتى تۇردە قولعا الىپ، جوندەيتىن بولامىز»، - دەيدى مەيرام نۇعىمان.
سەكتور مەڭگەرۋشىسىنىڭ ايتۋىنشا، بيىل جارناما جانە كورنەكى اقپارات ماتىندەرىن قاداعالاۋ بويىنشا وتكىزىلگەن مونيتورينگ بارىسىندا جەتى كوشەدە 580 نىسان تەكسەرىلىپ، 80 قاتە انىقتالعان. ونىڭ ىشىندە كوپتەگەن جاعدايدا قازاق تىلىندەگى سپەسيفيكالىق ارىپتەردى جازۋ كەزىندە قاتەلىككە جول بەرىلەدى.
«بارلىق قاتەلىكتەر بويىنشا «قازاقستان رەسپۋبليكاسىنىڭ ءتىل تۋرالى» زاڭىنا سايكەس بولۋى تۋرالى ناسىنداردىڭ يەلەرىمەن سويلەسىپ، 60 حات جىبەرىلدى. وسىنىڭ ناتيجەسىندە زاڭ بۇزۋشىلىقتار رەتكە كەلتىرىلدى. سونداي-اق زاڭ تالاپتارىن ساقتاۋ ماقساتىندا شاعىن جانە ورتا بيزنەس وكىلدەرىنە تەگىن كەڭەس بەرىلەتىنىن ايتا كەتكەن ءجون»، - دەيدى مەيرام نۇعىمان.
