مەملەكەتتىڭ قورعانىس قابىلەتى مەن قۇقىق ءتارتىبىن قامتاماسىز ەتۋگە 6,5 تريلليون تەڭگە بولىنەدى
بۇل تۋرالى سەناتتىڭ جالپى وتىرىسىندا «2023-2025 -جىلدارعا ارنالعان رەسپۋبليكالىق بيۋدجەت تۋرالى» زاڭ جوباسىن تانىستىرعان پرەمەر- ءمينيستردىڭ ورىنباسارى - قارجى ءمينيسترى ەرۇلان جاماۋبايەۆ ايتتى، دەپ حابارلايدى قازاقپارات ءتىلشىسى.
«بيۋدجەت شىعىستارىنىڭ كەلەسى ماڭىزدى باعىتى - ەكونوميكا سالالارىن قولداۋ جانە دامىتۋ. ءۇشجىلدىق كەزەڭدە وسى ماقساتتارعا 6,1 تريلليون تەڭگە، ونىڭ ىشىندە 2023 -جىلعا 2,5 تريلليون تەڭگە قاراستىرىلعان. وسى باعىت ەسەبىنەن كولىك ينفراقۇرىلىمىن دامىتۋ، تازا اۋىز سۋ جانە تابيعي گازبەن قامتاماسىز ەتۋ، بيزنەستى قولداۋ جانە باسقا دا باسىم مىندەتتەردى ىسكە اسىرۋ جوسپارلانىپ وتىر. مەملەكەتتىڭ قورعانىس قابىلەتى مەن قۇقىق ءتارتىبىن قامتاماسىز ەتۋگە ءۇش جىلعا 6,5 تريلليون تەڭگە، ال 2023 -جىلعا 2,3 تريلليون تەڭگە كوزدەلگەن»، - دەدى ەرۇلان جاماۋبايەۆ.
ونىڭ اتاپ وتۋىنشە، وڭىرلىك ساياسات مەملەكەتتى دامىتۋدىڭ ماڭىزدى باعىتتارىنىڭ ءبىرى سانالادى. بۇل رەتتە، ءۇشجىلدىق كەزەڭدە وڭىرلەرگە سۋبۆەنتسيالار رەتىندە 16,1 تريلليون تەڭگە، ال 2023 -جىلى 5 تريلليون تەڭگە بولىنەدى.
«بيۋدجەت جوباسىندا نىسانالى ترانسفەرتتەر 3,7 تريلليون تەڭگە كولەمىندە كوزدەلدى، ونىڭ ىشىندە 2023 -جىلى - 1,1 تريلليون تەڭگە. جالپى ءۇشجىلدىق كەزەڭدە وڭىرلەرگە رەسپۋبليكالىق بيۋدجەت قاراجاتى ەسەبىنەن 19,8 تريلليون تەڭگە، ونىڭ ىشىندە 2022 -جىلى - 6,2 تريلليون تەڭگە نەمەسە بيۋدجەتتىڭ جالپى شىعىستارىنىڭ 29,3 پايىزى بولىنەتىن بولادى»، - دەدى ۆيتسە- پرەمەر.
اۆتور
مارلان جيەمباي
