اتىراۋدا 6 ايدا ەسىرتكىنى زاڭسىز ساتۋ، تاراتۋ قىلمىسىمەن 30 ادام سوتتالدى

اتىراۋ وبلىستىق پروكۋراتۋراسى باسپا ءسوز قىزمەتىنىڭ اقپاراتىنا سۇيەنسەك، سوتتالعانداردىڭ اراسىندا 18 جاستاعى بويجەتكەن مەن 20 جاستاعى جاس جىگىت بار.

«ەسىرتكى مەن پسيحوتروپتىق زاتتاردى اسا ءىرى مولشەردە تاراتۋ - 10 جىلدان ءومىر بويىنا باس بوستاندىعىنان ايىرۋ تۇرىندەگى قىلمىستىق جاۋاپكەرشىلىككە اكەلىپ سوقتىراتىن اسا اۋىر قىلمىس. ال سينتەتيكالىق زاتتاردىڭ سالماعى 1 گرامنان اسسا، ءىرى مولشەر بولىپ سانالادى. اتىراۋ وبلىسىندا بيىلعى 6 ايدا ەسىرتكى جانە پسيحوتروپتىق زاتتاردىڭ زاڭسىز اينالىمىنا بايلانىستى قىلمىس جاساعانى ءۇشىن 30 ادام سوتتالدى. ونىڭ ىشىندە 21 ادام ەسىرتكىنى زاڭسىز تاراتىپ كەلگەن. ماسەلەن، سوت ۇكىمىمەن 18 جاستاعى جاس قىز سينتەتيكالىق ەسىرتكىنى تاراتقانى ءۇشىن 7 جىلعا باس بوستاندىعىنان ايىرىلدى. ونى مۇنداي قىلمىستىق ارەكەتكە 20 جاستاعى جىگىتى تارتقان. سول سەبەپتەن جاس جىگىتكە 10 جىلعا باس بوستاندىعىنان ايىرۋ جازاسى تاعايىندالدى»، - دەپ حابارلادى وبلىستىق پروكۋراتۋرانىڭ باسپا ءسوز قىزمەتى.

بەلگىلى بولعانداي، اسىرەسە، جاستاردىڭ مۇنداي قىلمىستاردى جەڭىل جولمەن مول اقشا تابۋ ءۇشىن جاسايتىنى انىقتالعان.

«ءبىراق جاستار ەسىرتكى ساتۋمەن اينالىسقان كەزدەگى ءىس- ارەكەتىنىڭ اۋىرلىعىن، بۇل قىلمىستىڭ قانداي سالدارى بولۋى مۇمكىن ەكەنىن ەسكەرمەيدى. سوندىقتان ازاماتتارعا مۇقيات بولۋ، جەڭىل پايداعا بەرىلمەۋ جانە كۇدىكتى ارەكەتتەر تۋرالى قۇقىق قورعاۋ ورگاندارىنا حابارلاۋ قاجەتتىگىن ەسكەرتەمىز»، - دەپ ءمالىم ەتتى پروكۋراتۋرانىڭ باسپا ءسوز قىزمەتىنەن.

ەسكە سالا كەتەلىك، بۇعان دەيىن اتىراۋعا وزگە وڭىردەن كەلىپ، ەسىرتكى ساتقان ەكى ادام 7 جانە 10 جىلعا سوتتالعانىن جازعان ەدىك.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى