ەلباسى: جەزقازعان وڭىرىنەن 6 مىڭ حالىقتى جاقسى ايماققا كوشىرۋ ءۇشىن مەملەكەت 250 ميلليون دوللار قارجى بولەدى

بۇل تۋرالى بۇگىن «حابار» تەلەارناسىنا ەكسكليۋزيۆتى سۇحبات بەرگەن ق ر پرەزيدەنتى نۇرسۇلتان نازاربايەۆ ايتتى.

«بۇل وڭىردە قانىش ساتبايەۆ دەگەن عۇلاما عالىمنىڭ مىس كەنىن تابۋى مەن جەزقازعان قالاسىنىڭ ورناۋى ەكەۋى ءبىر-بىرىمەن ساباقتاس. قازىرگى جاعدايدا 50-60 جىل ءوتىپ، قانشا كەن، مىس شىعارىلدى. جەردىڭ قويناۋىنداعى بايلىقتىڭ تاۋسىلاتىن كەزى بولادى. سول سياقتى جەزقازعاننىڭ توڭىرەگىندەگى مىس كەنى تاۋسىلىپ، قالانىڭ جاعدايى ناشارلاي باستادى. بۇل تابيعي ماسەلە»، - دەدى ەلباسى.

مەملەكەت باسشىسىنىڭ اتاپ وتۋىنشە، وسى وڭىردە مىس كەنىن وندىرۋمەن اينالىساتىن كومبيناتتىڭ جۇمىسىن ۇزارتۋ ءۇشىن تىڭ شارالار قولعا الىنباق.

«كومبيناتتىڭ جۇمىسىن ۇزارتۋ ءۇشىن جەردىڭ استىندا قالعان، ورىسشا تەرمينمەن ايتقاندا، سەليكتەردى يگەرۋ قاجەت. مۇنداي ءىرى كەندەردى شاحتانىڭ توبەسىن ۇستاپ تۇرۋ ءۇشىن ادەيى قالدىرىپ قويادى. سول كەندەردىڭ ىشىندە باي مىس بار. ونى الۋ ءۇشىن ۇستىندە تۇرعان اۋىلداردى كوشىرۋ قاجەت. ويتكەنى، سەليكتى العان كەزدە جەر تومەن تۇسەدى دە، ويدىم-ويدىم بولىپ، بارلىعى جەر استىنا ءتۇسىپ كەتۋى مۇمكىن. سول ءۇشىن مەملەكەت 250 ميلليون اقشا شىعارىپ، التى مىڭ جامان، جۇپىنى ۇيدە تۇراتىن حالىقتى جاقسى وڭىرگە كوشىرىپ، استىنداعى كەندى الادى. ول جەرلەردەن 200 ميلليون توننا مىس وندىرىلەدى. سوندا كومبينات 20-30 جىل جۇمىس ىستەيتىن بولادى»، - دەدى ن.نازاربايەۆ.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى