5G جەلىسى بۇكىل برازيليادا قولجەتىمدى بولدى
استانا. قازاقپارات - برازيليانىڭ بۇكىل اۋماعىندا بەسىنشى بۋىننىڭ اۆتونومدى جەلىسى - 5G Standalone (SA) جۇمىس ىستەي باستادى. بۇل تۋرالى رەسپۋبليكانىڭ ۇلتتىق تەلەكوممۋنيكاتسيا اگەنتتىگى مالىمدەدى، دەپ حابارلايدى TV BRICS.
اتاپ وتىلگەندەي، الدىڭعى بۋىن تەحنولوگيالارىن قولدانباي جۇمىس ىستەيتىن « تازا» 5G بۇرىن 770 قالادا قولجەتىمدى بولعان. جەلى 300 مبيت/س ورتاشا جىلدامدىعىمەن 35 ميلليون پايدالانۋشىعا قىزمەت كورسەتتى. بۇل - قولدانىستاعى 262 ميلليون قۇرىلعىنىڭ شامامەن %13 ى.
ەندى تاعى 190 قالادا جەلى ىسكە قوسىلىپ، برازيليانىڭ بارلىق ايماقتارى جاڭا تەحنولوگياعا قوسىلا الادى. 2021 - جىلى وتكەن 5G اۋكسيونىنىڭ شارتتارىنا سايكەس، برازيليالىق وپەراتورلار 2029 - جىلدىڭ سوڭىنا دەيىن بارلىق ەلدى مەكەندەردە وسى جەلىگە قولجەتىمدىلىكتى قامتاماسىز ەتۋگە مىندەتتى.
ەلدەگى ينتەرنەت جىلدامدىعى 1 دەن 10 گبيت/س ارالىعىندا بولۋى مۇمكىن. بۇلقازىرگى كەزدە جىلدامدىعى شامامەن 19,8 مبيت/س بولعان 4G جەلىسىنە قاراعاندا 100 ەسە جوعارى.
بۇعان دەيىن قىتايلىق تەلەكوممۋنيكاتسيا ماماندارى التىنشى بۋىن سىمسىز تەحنولوگياسى - 6G ءۇشىن الەمدەگى العاشقى دالالىق سىناق جەلىسىن جاساعان بولاتىن. قىتاي 2030 - جىلى ساندىق ۇيالى بايلانىس جەلىلەرى ءۇشىن 6G تەحنولوگياسىن كوممەرتسيالىق پايدالانۋعا كوشۋى مۇمكىن.
