سارىاعاشتا قازا بولعان 5 جاسار قىزدىڭ تۋىستارى بەيبىت ميتينگ وتكىزدى

بۇگىن سارىاعاش اۋدانى جىبەك جولى اۋىلىندا كىسى قولىنان قازا تاپقان 5 جاسار قىزدىڭ «بەيسەنبىلىك اسى» ءوتتى. باتادان شىققان ءبۇلدىرشىننىڭ تۋىستارى قىلمىسكەردىڭ قاتاڭ جازالانۋىن تالاپ ەتىپ، بەيبىت ميتينگ وتكىزدى. «ادىلدىك سوت بولسىن!»، «پەدافيلدەرگە ءولىم!» دەگەن جازۋى بار پلاكاتتاردى ۇستاپ، 20 عا جۋىق ادام كوشەگە شىقتى.

جينالعاندارمەن وبلىس پروكۋرورىنىڭ ءبىرىنشى ورىنباسارى د. سىزدىقوۆ، اۋدان اكىمى ا. ابدۋللايەۆ، اۋداندىق پوليتسيا ءبولىمىنىڭ باستىعى ە. بەيسەبايەۆ تۇسىندىرمە جۇمىستارىن جۇرگىزدى.

«پوليتسەيلەر قوعامدىق ءتارتىپ پەن ازاماتتاردىڭ قاۋىپسىزدىگىن قامتاماسىز ەتۋ بويىنشا شارالار قابىلدادى. جينالعاندارمەن ءتۇسىندىرۋ جۇمىستارى جۇرگىزىلىپ، ءبىر جارىم ساعاتتان كەيىن ولار ۇيلەرىنە تارقادى. قازىرگى تاڭدا اۋىلداعى جاعداي ءبىرقالىپتى جانە قاندايدا ءبىر قوعامدىق ءتارتىپتى بۇزۋ بولعان جوق»، - دەلىنگەن تۇركىستان وبلىسى پوليتسيا دەپارتامەنتىنىڭ باسپا ءسوز قىزمەتى تاراتقان اقپاراتتا.

قۇزىرلى ورگاندار تاراپىنان جاعداي باقىلاۋعا الىنعان. ال، سارىاعاش اۋدانى اكىمىنىڭ باسپا ءسوز قىزمەتى اۋىلداعى ساياسي احۋال تۇراقتى ەكەندىگىن حابارلادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى