اۋىر اتلەتيكا فەدەراتسياسى ۆلاديمير سەدوۆتىڭ وتباسىنا 5 ميلليون تەڭگە بولەدى
قازاقستان اۋىر اتلەتيكا فەدەراتسياسىنان ءمالىم ەتكەنىندەي، ەلىمىزدىڭ ەڭبەك سىڭىرگەن سپورت شەبەرى، حالىقارالىق دارەجەدەگى سپورت شەبەرى، قازاقستاننىڭ الدەنەشە دۇركىن چەمپيونى جانە رەكوردشىسى ۆلاديمير سەدوۆ بالا جاسىنان سپورتقا ادال بولدى.
2008 -جىلعى وليمپيادادا 84 كەلىگە دەيىنگى سالماقتا ۆلاديمير سەدوۆ ءتورتىنشى ورىنعا يە بولدى.
تاماشا تابىستارى ءۇشىن «قۇرمەت» وردەنىمەن ماراپاتتالدى.
ۆلاديمير 35 جاستا ەدى.
«ق ر اۋىر اتلەتيكا فەدەراتسياسىنىڭ ۇجىمى ۆلاديميردىڭ وتباسى مەن تۋعان-تۋىستارىنا قايعىرا كوڭىل ايتادى. جولداسىمىزدىڭ قازاسىنا بايلانىستى قايعىعا ورتاقپىز. قازاقستان اۋىر اتلەتيكا فەدەراتسياسى ۆلاديمير سەدوۆتىڭ وتباسىنا 5 ميلليون تەڭگە كولەمىندە كومەك بەرەدى، سونداي-اق ۇلىن تاربيەلەۋگە قاجەتتى قولداۋ كورسەتەدى.
سوڭعى جىلدارداعى قايعىلى وقيعالار سپورتشىلاردىڭ ۇلكەن سپورتپەن قوش ايتىسقاننان كەيىن قيىندىقتارعا تاپ بولاتىنىن كورسەتەدى. فەدەراتسيا سپورت ارداگەرلەرىن قولداۋ باعدارلاماسىن جاساپ، جۇرتشىلىققا ۇسىناتىن بولادى. سونىڭ اياسىندا كومەككە مۇقتاج اۋىر اتلەتتەرگە قولداۋ كورسەتىلەدى. اتلەتتەر مەن باپكەرلەردى قولداۋ ءۇشىن فەدەراتسيا بيىل تارتىلعان دەمەۋشىلىك قارجى ەسەبىنەن 10 ميلليون تەڭگە بولەتىن بولادى»، - دەلىنگەن مالىمدەمەدە.
ەسكە سالا كەتەيىك، اۋىر اتلەتيكادان ءتورت دۇركىن ەل چەمپيونى ۆلاديمير سەدوۆ 27-ماۋسىم كۇنى ومىردەن ءوتتى.
«35 جاستاعى اۋىر اتلەتتىڭ دەنەسى ءوزى تۇراتىن مەكەنجايى - قاراتال اۋدانىنداعى دوستىق اۋىلىنان تابىلدى. دەنەسىنەن زورلىق-زومبىلىق بەلگىلەرى انىقتالعان جوق. مارقۇمنىڭ تۋىستارى بەرگەن تۇسىنىكتەمەگە سايكەس، ول ءوز-وزىنە قول سالعان. قازىر سۋيتسيد فاكتىسىنە وراي قىلمىستىق ءىس قوزعالدى»، - دەلىنگەن ەدى جەتىسۋ وبلىستىق پوليتسيا دەپارتامەنتى باسپا ءسوز قىزمەتىنىڭ حابارلاماسىندا.
ۆ. سەدوۆتىڭ ولىمىنە قاتىستى اۋىر اتلەت يليا يلين الەۋمەتتىك جەلىدەگى جەكە پاراقشاسىندا پىكىر بىلدىرگەن بولاتىن.
