تەمىرتاۋدا سالماعى 5 كەلىدەن اساتىن الىپ بالا دۇنيەگە كەلدى
بۇل - بايان جۇرماعانبەتوۆانىڭ ءتورتىنشى بالاسى. وتباسىندا ەكى قىز بەن ءبىر ۇل بار.
ال ءتورتىنشىسىن 22- اقپاندا بوسانعان. سول كۇنى جۇكتى ايەل تولعاعى باستالىپ، تەمىرتاۋ قالاسىنىڭ كوپسالالى انا مەن بالا ورتالىعىنا تۇسكەن.
بىرەر ساعاتتان سوڭ كەلىنشەك امان-ەسەن اياق-قولىپ باۋىرىنا جيناپ، باتىرىن دۇنيەگە اكەلگەن. قازىر نارەستە مەن اناسى دارىگەرلەردىڭ باقىلاۋىندا.
«22- اقپاندا جەدەل جاردەم كولىگىمەن جۇكتى ايەل تەمىرتاۋ قالاسىنىڭ كوپسالالى انا مەن بالا ورتالىعىنا جەتكىزىلگەن. سول كۇنى بوساندى. سالماعى - 5055 گرام جانە بويى 57 سانتيمەتر ەر بالا دۇنيەگە كەلدى»، - دەپ حابارلادى قاراعاندى وبلىسىنىڭ دەنساۋلىق ساقتاۋ باسقارماسى.
بايان جۇرماعانبەتوۆا دارىگەرلەرگە كاسىبيلىگى جانە ءسابيىن امان ەسەن دۇنيەگە الىپ كەلۋگە كومەگى ءۇشىن العىس ايتتى.
«جۇكتىلىك كەزىندە قيىن بولدى، ءبىراق جەڭىل بوساندىم. دارىگەرلەر مەنىڭ كۇش-جىگەرىمدى باقىلاپ وتىردى، مەن تابيعي جولمەن بوساندىم. كەسار تىلىگىن جاساي ما دەپ ۋايىمداپ ەدىم، ءبىراق اللا تاعالا مەن دارىگەرلەردىڭ ارقاسىندا ءبارى ويداعىداي ءوتتى»، - دەيدى بايان جۇرماعانبەتوۆا.
اكۋشەرلىك تاجىريبەدە بالالاردىڭ جوعارى سالماقپەن دۇنيەگە كەلۋى ءجيى كەزدەسەدى، سالماعى 4 كەلىگە دەيىن تۋىلعان نارەستەلەر ۇلكەن بولىپ سانالادى.
ال سالماعى 5 كەلىدەن اساتىن الىپ بالالاردى دارىگەرلەر باتىرلار دەپ اتايدى.
قاراعاندى وبلىسىندا سالماعى جوعارى بالالار ءجيى تۋىلادى. 2022-جىلى ۇلكەن سالماقپەن 54 نارەستە، جانەدە سالماعى وتە جوعارى 10 الىپ بالا دۇنيەگە كەلگەن.
ونىڭ ىشىندە ەڭ ۇلكەنىنىڭ سالماعى 6520 گرام بولدى. ول باتىر بالا وبلىستىق كلينيكالىق اۋرۋحانانىڭ پەريناتالدىق ورتالىعىندا دۇنيەگە كەلدى.
2023-جىلدىڭ باسىنان باستاپ وبلىستا ۇلكەن سالماقپەن 4 ءسابي جانە تەمىرتاۋدىڭ كوپسالالى انا مەن بالا ورتالىعىندا ءبىر الىپ بالا دۇنيەگە كەلگەن.
