ساعاتىنا - 5 ميلليون تەڭگە. فۋتبول جۇلدىزدارىنىڭ جالاقىسى قانشا؟
Massaget.kz ءتىلشىسى ەۋروپالىق توپ-ليگالاردا ويناپ جۇرگەن فۋتبول جۇلدىزدارىنىڭ جالاقىسى تۋرالى باياندايدى.
فۋتبولشىلاردىڭ جالاقىسى رەسمي اقپارات جوق. ءتۇرلى باسىلىم ءوز نۇسقاسى بويىنشا جالاقىلار كەستەسىن جاسايدى. بۇل تۇستا ەۋروپالىق توپ-ليگالارداعى فۋتبولشىلاردىڭ جالاقىسىن ەسەپتەيتىن capology دەگەن باسىلىم بار. نەگىزى فۋتبولشىلاردىڭ جالاقىسىن ەڭ ءدال ايتاتىن ءدال وسى باسىلىم سانالادى.
ءبىز وسى باسىلىمنىڭ دەرەكتەرىنە سۇيەندىك. مۇندا ءار فۋتبولشىنىڭ كلۋبىندا الاتىن جالاقىسى كەلتىرىلگەن. جارنامالىق كەلىسىمشارت اقشاسى قۇپيا ساقتالادى.
كيليان مباپپە - 90910000 ەۋرو
الەمدە جالاقىسى ەڭ كوپ فۋتبولشى - كيليان مباپپە. فرانسۋز بيىل مامىردا پ س ج- مەن جاڭا كەلىسىمشارت جاساسقان بولاتىن. بۇل كەلىسىم بويىنشا مباپپەنىڭ جىلدىق جالاقىسى 90 ميلليون ەۋرودان اسادى. جاڭا مامىلە 2025-جىلدىڭ جازىنا دەيىن جاسالعان.
بۇل سومانى تەڭگەگە شاققاندا، مباپپە جىلىنا 45,4 ميلليارد تەڭگە الادى ەكەن. بۇل:
ايىنا - 3,7 ميلليارد تەڭگە
كۇنىنە - 122,1 ميلليون تەڭگە
ساعاتىنا - 5 ميلليون تەڭگە
مينۋتىنا - 84816 تەڭگە
سەكۋندىنا - 1413 تەڭگە.
مباپپە وسى ماۋسىمدا پ س ج ساپىندا 20 ماتچ وتكىزىپ، 19 گول مەن 5 ناتيجەلى پاستىڭ اۆتورى اتانعان. سونىمەن قاتار، تاياۋدا عانا اياقتالعان الەم چەمپيوناتىنىڭ ۇزدىك سۇرمەرگەنى بولعان ەدى - 8 گول.
ليونەل مەسسي - 63640000 ەۋرو
پ س ج- نىڭ تاعى ءبىر جۇلدىزى ليونەل مەسسي جىلىنا 63,6 ميلليون ەۋرو تابادى. ارگەنتينالىق فۋتبولشى پاريجدىك كومانداعا بىلتىر تامىزدا اۋىسقان بولاتىن. كەلىسىمشارت 2023-جىلى جازدا اياقتالادى.
مەسسيدىڭ جىلدىق جالاقىسى - 31,8 ميلليارد تەڭگە. بۇل:
ايىنا - 2,6 ميلليارد تەڭگە؛
كۇنىنە - 85,4 ميلليون تەڭگە؛
ساعاتىنا - 3,5 ميلليون تەڭگە؛
مينۋتىنا - 59374 تەڭگە؛
سەكۋندىنا - 989 تەڭگە.
ليونەل دە وسى ماۋسىمدى وتە ءساتتى وتكىزىپ جاتىر. پسج ساپىنداعى 19 ويىندا 12 گول سوعىپ، 14 ناتيجەلى پاس بەرگەن. ال كاتارداعى الەم چەمپيوناتىندا ارگەنتينا قۇراماسىمەن بىرگە توپ جارىپ، تۋرنيردىڭ ۇزدىك ويىنشىسى اتانعان بولاتىن.
نەيمار - 56360000 ەۋرو
ءۇشىنشى ورىندا دا – پ س ج ويىنشىسى. برازيليالىق نەيماردىڭ جىلدىق جالاقىسى - 56,3 ميلليون ەۋرو. نەيمار ءدال قازىر الەمدەگى ەڭ قىمبات فۋتبولشى سانالادى. سەبەبى 2017-جىلى پ س ج ونى «بارسەلونادان» 222 ميلليون ەۋروعا ساتىپ العان. كەلىسىمشارت 2025-جىلدىڭ جازىنا دەيىن جاسالعان.
نەيماردىڭ جالاقىسىن تەڭگەگە شاققاندا جىلىنا 28,1 ميلليارد تەڭگە شىعادى. بۇل:
ايىنا - 2,3 ميلليارد تەڭگە
كۇنىنە - 75,7 ميلليون تەڭگە
ساعاتىنا - 3,1 ميلليون تەڭگە
مينۋتىنا - 52582 تەڭگە
سەكۋندىنا - 876 تەڭگە.
نەيمار دا بيىل بابىندا. پ س ج قۇرامىنداعى 20 ويىندا 15 گول سوعىپ، 12 ناتيجەلى پاستىڭ اۆتورى اتانعان.
ەدەن ازار - 31250000 ەۋرو
مادريدتىك «رەالدىڭ» ويىنشىسى ەدەن ازار - ءتورتىنشى ورىندا. ازاردىڭ جىلدىق جالاقىسى - 31,2 ميلليون ەۋرو. بۇل - 15,6 ميلليارد تەڭگە. ياعني:
ايىنا - 1,3 ميلليارد تەڭگە
كۇنىنە - 41,9 ميلليون تەڭگە
ساعاتىنا - 1,75 ميلليون تەڭگە
مينۋتىنا - 29 155 تەڭگە
سەكۋندىنا - 485 تەڭگە.
بەلگيالىق فۋتبولشى مادريدتىك كلۋبقا 2019-جىلى 115 ميلليون ەۋروعا اۋىسقان. سول كەزدە «رەال» جانكۇيەرلەرى ازار كوماندادان كەتكەن كريشتيانۋ رونالدۋدىڭ ورنىن باسادى دەپ كۇتكەن. ءبىراق ازار ءسات سايىن جاراقات الىپ، الاڭعا وتە سيرەك شىعاتىن بولدى.
قازىرگى ماۋسىمدا دا ازار كوبىنە قوسالقى قۇرامدا وتىرادى. «رەال» ساپىندا وسى ماۋسىمدا 6 ويىندا عانا الاڭعا شىعىپ، ءبىر گول مەن ءبىر ناتيجەلى پاستىڭ اۆتورى بولعان. ازار بەلگيا قۇراماسىمەن الەم چەمپيوناتىنا قاتىسقان، ءبىراق ول جاقتا دا كوزگە تۇسە الماي، كومانداسى توپتىق كەزەڭنەن ۇشىپ كەتتى.
فرەنكي دە يونگ - 29170000 ەۋرو
بەسىنشى ورىندا «بارسەلونا» جارتىلاي قورعاۋشىسى فرەنكي دە يونگ تۇر. ونىڭ جىلدىق جالاقىسى - 29,1 ميلليون ەۋرو. تەڭگەگە شاققاندا، 14,5 ميلليارد تەڭگە. بۇل:
ايىنا - 1,2 ميلليارد تەڭگە
كۇنىنە - 39 ميلليون تەڭگە
ساعاتىنا - 1,6 ميليون تەڭگە
مينۋتىنا - 27214 تەڭگە
سەكۋندىنا - 453 تەڭگە.
نيدەرلاندتىق فۋتبولشى «بارسەلونا» ساپىنا 2019-جىلى اۋىستى. قازىرگى كەلىسىمشارتى 2026-جىلدىڭ جازىنا دەيىن جارامدى.
كاتالونيالىق كلۋبتا ويىنشى 17 ماتچكە قاتىسىپ، 2 گول سوقتى، ءبىر ناتيجەلى پاس بەردى. ول «بارسەلونانىڭ» جارتىلاي قورعانىسىندا شەشۋشى ءرول اتقارادى.
ودان بولەك ۇزدىك وندىققا سەرحيو راموس (27,2 ميلليون ەۋرو) كيەۆين دە بريۋينە (24,6 ميلليون ەۋرو)، كارىم بەنزەما (24 ميلليون ەۋرو)، ەرلينگ حولاند (23,1 ميلليون ەۋرو) جانە داۆيد دە حەا (23,1 ميللون ەۋرو) كىرەدى.
ايتا كەتەيىك، بۇل تىزىمگە كريشتيانۋ رونالدۋدى قوسپادىق. پورتۋگاليالىق جۇلدىز تاياۋدا «مانچەستەر يۋنايتەد» ساپىنان كەتىپ، ەركىن اگەنت اتانعان. ازىرشە جاڭا كوماندا تاپقان جوق. ميۋ-دەگى جالاقىسى 31,7 ميلليون ەۋرو بولعان. ويىنشىعا بىرىككەن اراب امىرلىگىنىڭ «ءال-ناسر» كلۋبى ۇسىنىس جاساعانى حابارلاندى، اراب ۇجىمى وعان جىلىنا 200 ميلليون ەۋرو تولەۋگە دايىن.
