تارازىسى تالاپقا ساي ەمەس دۇكەن يەسىنە 5 ميلليون تەڭگەگە جۋىق ايىپپۇل سالىندى
ۆەدومستۆونىڭ مالىمەتىنشە، شاعىمدا 3-قازان كۇنى كەشكە ءوتىنىش بەرۋشى وسى كومپانياعا تيەسىلى دۇكەننەن سۇزبە مەن ايران ساتىپ العانى كورسەتىلگەن. سۇزبەنىڭ ماسساسى ورامداعى كورسەتىلگەن ماسساعا 0,5 ك گ سايكەس كەلمەدى. تەكسەرۋ بارىسىندا وسى دۇكەندە ساتىلاتىن سۇزبە ءونىمنىڭ ماسساسىن كورسەتپەي پاكەتتەرگە سالىناتىنى انىقتالدى.
«الايدا، سۇزبە ساتۋ كەزىندە فيسكالدىق چەكتە 0,5 ك گ سالماق كورسەتىلەدى. سونداي-اق، دۇكەننىڭ ساۋدا ءۇي- جايىندا شتريح- باسپا م15-2، 5د1ي1 ەلەكتروندى تارازى قولدانىلعان. جوسپاردان تىس تەكسەرۋ كەزىندە سالىستىرىپ تەكسەرۋ تۋرالى سەرتيفيكاتى دا جوق ەكەنى انىقتالدى، ال كەيىنىرەك ۇسىنىلعان سالىستىرىپ تەكسەرۋ تۋرالى سەرتيفيكات جارامسىز دەپ تانىلعان. وسىعان بايلانىستى ماتەريالدار ءتۇپنۇسقالىعى تۋرالى كۇمانمەن ءتيىستى ورگاندارعا جىبەرىلدى»، - دەپ جازىلعان حابارلامادا.
«ولشەم بىرلىگىن قامتاماسىز ەتۋ تۋرالى» زاڭنىڭ 22-بابىنا سايكەس، ولشەۋ قۇرالدارى؛ ساۋدا وپەراتسيالارىن جاساۋ كەزىندە يەلىكتەن شىعارىلاتىن ءونىم سانى؛ ونى وتكىزۋ كەزىندە كەز كەلگەن تۇردەگى قاپتاماداعى بۋىپ-تۇيىلگەن ءونىمنىڭ سانى مەملەكەتتىك مەترولوگيالىق باقىلاۋ وبەكتىلەرى بولىپ سانالادى.
بۇدان باسقا، زاڭنىڭ 19-بابىنا سايكەس مەملەكەتتىك مەترولوگيالىق باقىلاۋ وبەكتىلەرى بولىپ تابىلاتىن ولشەۋ قۇرالدارى ولاردىڭ ءتيپى بەكىتىلگەننەن نەمەسە مەترولوگيالىق اتتەستاتتالعاننان جانە اينالىمعا شىعار الدىندا، جوندەۋدەن كەيىن، پايدالانۋ كەزەڭىندە ولشەم بىرلىگىن قامتاماسىز ەتۋدىڭ مەملەكەتتىك جۇيەسىنىڭ تىزىلىمىندە تىركەلگەننەن كەيىن سالىستىرىلىپ، تەكسەرىلەدى.
«جوعارىداعى دۇكەندە ورناتىلعان تارازى سالىستىرىلىپ تەكسەرۋسىز قولدانىلعان جانە سالىستىرىلىپ تەكسەرۋدەن ۋاقتىلى وتپەگەن رەتىندە قولدانۋعا جارامسىز دەپ تانىلعانى انىقتالدى. وسى زاڭ تالاپتارىن بۇزعانى ءۇشىن «JARDI KZ» ج ش س «اكىمشىلىك قۇقىق بۇزۋشىلىق تۋرالى» كودەكستىڭ 419-بابى بويىنشا 4900800 تەڭگە سوماسىنا اكىمشىلىك جاۋاپكەرشىلىككە تارتىلدى، كەمشىلىكتەردى جويۋعا نۇسقاما بەرىلىپ، قايتا تەكسەرۋ تاعايىندالدى»، - دەپ جازدى ۆەدومستۆو.
سونىمەن قاتار، دەپارتامەنت ج ش س وكىلىنە «تەحنيكالىق رەتتەۋ تۋرالى» زاڭ تالاپتارىن بۇزا وتىرىپ، سايكەستىكتى باعالاۋ جانە ءونىمدى اينالىمعا شىعارۋعا تىيىم سالۋ تۋرالى «سۇر» قۇجاتتاردى الۋعا جول بەرمەۋ قاجەتتىگىن، سونداي-اق «ولشەم بىرلىگىن قامتاماسىز ەتۋ تۋرالى» زاڭعا سايكەس سالىستىرىلىپ تەكسەرۋدەن وتپەگەن ولشەم قۇرالدارىن قولدانعانى ءۇشىن زاڭدى جانە جەكە تۇلعانىڭ جاۋاپكەرشىلىگىن ءتۇسىندىردى.
اۆتور
اسحات رايقۇل
