اناسى قىزىنا ەشقاشان ايتپاۋى كەرەك 5 كەڭەس
قىزدارى كوبىنەسە اناسىنىڭ مىنەز- قۇلقى مەن قۇندىلىقتارىن قابىلدايدى، بۇل تابيعي نارسە. كۇيەۋىمەن جانجال، دوستارىمەن اڭگىمەلەسۋ سىندى جاس قىزدىڭ قالىپتاسۋىنا اسەر ەتەتىن كوپتەگەن نيۋانستار بار. اسىرەسە، كەڭەس بەرگەندە ساق بولۋ كەرەك.
«ءۇي شارۋاسىنا پىسىق ايەل عانا سىي- قۇرمەتكە لايىق»
كوبىنەسە انالار وزدەرىنىڭ قالاۋلارىنا نەمقۇرايلى قارايدى، بارلىق ۋاقىتتارىن كۇندەلىكتى ومىرگە جانە ءۇي شارۋاسىنا ارنايدى. بالا اناسىنىڭ قاتتى شارشاپ تۇرسا دا، وزىنە ءمان بەرمەي ءۇش مەزگىل اس ازىرلەيتىنىن، ءوزىن ناشار سەزىنسە دە، كۇيەۋىنىڭ اياق كيىمىن تازالايتىنىن كورىپ وسەدى. بۇل كۇيەۋىنە نەمەسە بالالارىنا قامقورلىق جاساۋ زياندى دەگەندى بىلدىرمەيدى، ءبىراق بارلىق نارسەنىڭ ءجونى بولعانى دۇرىس.
بۇل مىنەز- قۇلىق ۇلگىسى قىزعا جاقسىلىق الىپ كەلمەيدى. اناسى قىزىنا «سەنىڭ قاجەتتىلىكتەرىڭ ماڭىزدى ەمەس» دەگەن ويدى جەتكىزەدى، سوندىقتان «مەن باسقالارعا ۇناۋىم كەرەك» دەگەن تۇسىنىك قالىپتاسادى. مۇندايدا قىزى وسكەندە ونىڭ ءومىرى ءۇش سەناري بويىنشا وتەدى:
• انانىڭ مىنەز- قۇلىق ۇلگىسىن بويىنا ءسىڭىرىپ، ءوزىنىڭ جاعدايى مەن اماندىعىن ۇمىتىپ، بۇكىل ءومىرىن وتباسىنا ارنايدى.
• انانىڭ مىنەز- قۇلىق ستەرەوتيپىن جوققا شىعارادى جانە كەرىسىنشە ارەكەت ەتۋگە تىرىسادى، ءبىراق داعدارىستىق جاعدايلاردا، ەڭ الدىمەن، ول اناسىنىڭ قارىم-قاتىناسىن قايتالايدى.
• ءوز بەتىمەن نەمەسە ماماننىڭ كومەگىمەن قۇندىلىقتار جۇيەسىن قايتا قارايدى جانە ۇيرەنشىكتى ستسەنارييدەن كەتەدى.
«كۇيەۋىڭنىڭ ماحابباتىن جوعالتپاۋ ءۇشىن ادەمى بولۋىڭ كەرەك»
ەگەر ايەل وزىنە قاراپ، سىمباتىن قاداعالاپ وتىرسا، ول وزگە ادامعا ۇناماي قالۋ قورقىنىشى ەمەس، ءوز قالاۋى بولۋى كەرەك. انالارى قىزدارىنا: «ەگەر ءبىز سپورتپەن اينالىسپاساق، وندا ءبىزدىڭ فيگۋرالارىمىز يدەالدان الىس بولادى. اكەڭ مەنى تاستاپ كەتەدى، ال سەن ەشقاشان كۇيەۋگە شىقپايسىڭ» - دەپ تە ايتادى.
مۇنداي انالاردىڭ قىزدارى وسكەندە تومەندەگى جولداردىڭ بىرىمەن جۇرەدى:
• قىز ءوزىنىڭ سىرتقى كەلبەتىمەن نازار اۋدارتىپ، عاشىق قىلۋ ءۇشىن كۇرەسەدى. ول ۇنەمى وزىنە قارايدى، كەمشىلىكتەردى ىزدەيدى، ءوزى سەنىمسىز بولا باستايدى جانە يدەالعا جەتۋ ءۇشىن ءتۇرلى مانيپۋلياتسيالار جاسايدى.
• ول بارلىق سۇلۋلىق تاجىريبەلەرى مەن پروتسەدۋرالارىن جوققا شىعارادى. ول وزىنە قارامايدى، سىرتقى كەلبەتىنىڭ، كيگەن كيىمىنىڭ جانە شاشىنىڭ ۇقىپتى بولۋىنىڭ ماڭىزدىلىعىنا ءمان بەرمەيدى.
• وسى ماسەلەنى شەشىپ، سىرتقى كەلبەتىمەن ۇيلەسىمدى قاتىناسقا كەلەدى. ول ءۇشىن سۇلۋلىق شارالارى بىرەۋگە ۇناۋ ءۇشىن جاسايتىن ەمەس، ءلاززات سىيلايتىن پروتسەسس سانالادى.
«ەشكىمنىڭ كومەگىنە ءزارۋ بولما»
ەركىندىك - ول الەمگە دەگەن پاتولوگيالىق سەنىمسىزدىكتەن تۋىنداماسا عانا ادامعا قاجەت قاسيەت. كوبىنەسە ەر ادامدارمەن قارىم- قاتىناستا كوڭىلى قالعان انالار قىزدارىنا «ەشكىمگە سەنبە» دەگەن يدەيانى سىڭىرەدى. مۇنداي ايەلدەر تۇسقاعازدى وزدەرى جەلىمدەيدى، جيھازدى وزدەرى جىلجىتادى، اۋىر سومكەلەردى ەشكىمنىڭ كومەگىنسىز وزدەرى كوتەرەدى. سونىمەن بىرگە ولار كومەك سۇراعاندارعا مەنسىنبەي قارايدى. ولاردىڭ بۇرىنعى سەرىكتەسىنە دەگەن رەنىشى ونىڭ بارىنە ءوزى قول جەتكىزە الاتىنىن دالەلدەۋگە ۇمتىلۋمەن اياقتالادى.
مۇنداي انالار كوبىنە ەشكىمگە سەنبەيتىن قىزدار وسىرەدى. ولار رومانتيكالىق قارىم- قاتىناستارعا كۇمانمەن قارايدى جانە كوبىنەسە مانساپ جولىنا كەتەدى .
«ەر ادام - نان تابۋشى»
كەيبىر وتباسىلاردا جاۋاپكەرشىلىكتىڭ قاتاڭ ءبولىنۋى بايقالادى. قىزدار سونى ءسىڭىرىپ تاربيەلەنەدى. باستى ماقسات - ايەلدى اسىراي الاتىن باي جىگىتتى كەزدەستىرۋ. ارينە، وتباسىلىق بيۋدجەتتە ەر ءادامنىڭرولى ەرەكشە. ءبىراق ءاربىر قىز دامىپ كەلە جاتقان ادام ەكەنىن ۇمىتپاڭىز، ونىمەن اڭگىمەلەسۋ قىزىقتى جانە ونىڭ پىكىرى دە سونشالىقتى قۇندى جانە ماڭىزدى. ول تەك كۇيەۋىنىڭ تاپقان اقشاسىن تۇتىنىپ قانا وتىرۋشى بولماۋى كەرەك. ءوزىنىڭ پوتەنتسيالىن جۇزەگە اسىرۋ ارقىلى جەتىلۋ جولىنا تۇسەدى.
«كۇيەۋىڭە بار سىرىڭدى شاشپا»
كەيبىرەۋلەر باقىتتى قارىم- قاتىناستىڭ كىلتى ايەلدىڭ ايلاكەرلىگى دەپ سانايدى. مۇنداي مىنەز- قۇلىق ۇلگىسىن كەيدە قىزدىڭ ءومىرىن جەڭىلدەتەتىن دانالىق رەتىندە ۇسىنىپ تا جاتادى. اناسى قىزىنا: «كۇيەۋىڭە قانشا تاباتىنىڭدى ايتپا» نەمەسە «قۇربىڭمەن مەيرامحانادا بولعانىڭدى ايتپا» دەگەن سياقتى كەڭەستەر ايتادى.
ەرتە مە، كەش پە، جۇبايىنىڭ وتىرىك ايتىپ جۇرگەنى بەلگىلى بولىپ، قارىم- قاتىناس ودان دا ناشارلايدى. ءوزىڭىزدىڭ تالعامىڭىزدى، قالاۋلارىڭىزدى جانە مۇمكىندىكتەرىڭىزدى جاقىن ادامىڭىزدان جاسىرا وتىرىپ، ءسىز ونىڭ الدىندا وزىڭىزگە ءتىن ەمەس مىنەز- قۇلىق ۇلگىسىن جاسايسىز.
ارينە، اناسى قىزىنا جاماندىق تىلەمەيدى. ءبىراق ول دا ءوز ءبىلىمى مەن تاجىريبەسى نەگىزىندە عانا كەڭەس ايتا الاتىنىن ەسكەرىڭىز. الاتىنىن الىپ، ەسكىسىن جاڭارتىپ، جارامسىزىن، تاستاۋ ءوز ەركىڭىزدە ەكەنىن ۇمىتپاڭىز.
