ەلوردادا اشىق اسپان استىندا 5 كۇن بويى «ۇلى دالا» ەتنوفەستيۆالى وتەدى
ەلورداداعى «بايتەرەكتىڭ» الاڭىندا قاز- قاتار كيىز ۇيلەر تىگىلىپ، ورتاعا ەڭسەلى ساحنا ورناتىلىپتى. الەمدىك جانە ءداستۇرلى ءدىن كوشباسشىلارىنىڭ Ⅶسەزىنە كەلگەن مەيمانداردى استانا بيىل وسىلاي قارسى الماقشى. «ۇلى دالا» دەگەن اتاۋ العان ەتنوفەستيۆالدىڭ مازمۇنى مەن ءمانى تۋرالى قويۋشى باس رەجيسەرى اسحات مەميروۆ ايتىپ بەردى.
«الەمدىك جانە ءداستۇرلى ءدىن كوشباسشىلارىنىڭ Ⅶسەزى اياسىندا ەلورداعا كەلگەن قوناقتارعا، وسى سەزگە قاتىسۋشىلارعا، جالپى تۋريستەرگە ارناپ قىركۇيەكتىڭ جايماشۋاق كۇنىندە «ۇلى دالا» ەتنوفەستيۆالىن وتكىزىپ جاتىرمىز. شارا نۇر- سۇلتان قالاسىنىڭ اكىمدىگىنىڭ ۇيىمداستىرۋىمەن، قالالىق مادەنيەت باسقارماسىنا قاراستى مادەني ۇجىمداردىڭ قاتىسۋىمەن وتەدى. سەزگە كەلگەن قوناقتاردىڭ ىشىندە ءدىن كوشباسشىلارىنان بولەك تەولوگ عالىمدار، مادەنيەتتانۋشىلار، رۋحاني قايرەتكەرلەر بار.
باستى ماقسات - سولارعا ۇلى دالانىڭ مادەني، مۋزىكالىق مۇراسىن ناسيحاتتاۋ، دارىپتەۋ»، - دەيدى ەلورداداعى مۋزىكالىق جاس كورەرمەن تەاترىنىڭ ديرەكتورى.
بايتەرەكتىڭ قوس قاپتالىنا تىگىلگەن كيىز ۇيلەرگە باس سۇعىشۋىلار كوپ ەكەنى اڭعارىلادى. شەتەلدىكتەر دە، جەرگىلىكتى تۇرعىندار دا اسىرەسە قىران قۇس پەن قۇماي تازىنى كوبىرەك تاماشالاپ ءجۇر.
«ەلوردامىزدىڭ تورىندە، «بايتەرەكتىڭ» ەكى قاپتالىنا كيىزۇيلەر تىكتىك. ءبىر قاناتتا قازاقتىڭ زەرگەرلىك بۇيىمدارى، قولونەر تۋىندىلارى كورمەگە قويىلعان. سونىڭ ىشىندە ۇلتتىق كيىمدەرىمىزدىڭ تىگىلۋ پروتسەسى كورسەتىلەدى. قىشتان، تەمىردەن جاسالاتىن بۇيىمداردى قالاي ىستەلەتىنىن دە كورۋگە بولادى. ەكىنشى قاپتالداعى كورمە نەگىزىنەن قازاقتىڭ ساياتشىلىق ونەرىە ارنالعان. قىران بۇركىت، قۇماي تازى ۇستاعان ساياتشىلار شەتەلدىك قوناقتاردىڭ نازارىن بىردەن اۋدارىپ جاتىر. ودان بولەك ۇلتتىق تاعامدارىمىز دا ەل نازارىنا ۇسىنىلادى. ال ورتاداعى ۇلكەن ساحنادا بەس كۇندە بەس ءتۇرلى كونتسەرتتىك باعدارلاما قويىلادى»، - دەدى فەستيۆالدىڭ باس قويۋشى رەجيسەرى.
ونىڭ ايتۋىنشا، بەس كۇندىك فەستيۆالگە ءداستۇرلى مۋزىكانىڭ كورنەكتى وكىلدەرى ءان- كۇي، جىرلارىن دايىنداپ جاتىر.
«مىسالى، قازىر قالالىق مۋزىكالىق جاس كورەرمەن تەاترى «ۇلى دالانىڭ سالت- داستۇرلەرى» دەگەن تاقىرىپپەن تەاترلاندىرىلعان قويىلىم ارقىلى كوشپەندىلەر مادەنيەتىندەگى بەسىكتوي، تۇساۋكەسەر، قىز ۇزاتۋ، كەلىن ءتۇسىرۋ سياقتى قۋانىشتاردىڭ ورنى قانداي بولعانىن كورسەتىپ جاتىر. ولارداعى ايتىلاتىن عۇرىپتىق جىرلار شىرقالىپ جاتىر. التىباقاندا قىز- جىگىتتىڭ تابىسۋى، باستاڭعى، اقسۇيەك سياقتى ءداستۇرلى ويىنداردى دا وسى جەردەن تاماشالاۋعا بولادى.
كەشكە قاراي ەركەعالي راحماديەۆ اتىنداعى ەلواردالىق اكادەميالىق فيلارمونيانىڭ ەڭ ۇزدىك ۇجىمدارى، ونىڭ ىشىندە «قورقىت سازى» ەتنوفولكلورلىق ءانسامبلى، «شاتتىق» دومبىراشىلار ءانسامبلى، «گاككۋ» جەتىگەنشىلەر توبى جانە ارايلىم راقىم قىزى باستاعان ءداستۇرلى انشىلەر ونەرىن پاش ەتەدى»، - دەدى اسحات ماەميروۆ.
ءان مەن كۇيدىڭ شەرۋى ەرتەڭ دە جالعاسپاق.
«قازاقتىڭ ءداستۇرلى مۋزىكاسىن الەمدىك ارەنادا ناسيحاتتاپ جۇرگەن مۋلتيمۋزىكانت، ءبىر ءوزى ءبىر تەاتر ىسپەتتەس قازاقستاننىڭ ەڭبەك سىڭىرگەن قايراتكەرى ەدىل قۇسايىنوۆ ءوزىنىڭ ارنايى باعدارلاماسىن جاساپ جاتىر. قازاقتىڭ بەستۇرلى ءان مەكتەبىنىڭ كورنەكتى وكىلدەرى دە اننەن شاشۋ شاشپاقشى.
ولاردىڭ ورتاسىندا The Magic of Nomads اتىمەن قازاقتىڭ ءان- كۇيىن الەمگە زاماناۋي تاسىلمەن تانىتىپ جۇرگەن عازيزا عابدراحيموۆا دا بار.
وزدەرىڭىز كورىپ وتىرسىزدار «بايتەرەك» ماڭىندا شەتەلدىكتەر كوپ ءجۇر. ءبارى ەرەكشە كوڭىل كۇيگە بولەنىپ، قازاقتىڭ ويۋ- ورنەگىنە ءتانتى بولعاندارىن ايتىسىپ جاتىر. فەستيۆال كەلەسى جىلى دا جالعاسىن تاباتىنىنا سەنەمىن. فەستيۆال بۇگىن باستالدى. الاعى كۇن بويى تاڭعى ساعات 10.00 دا باستالىپ، كەشكى ساعات 21.00 گە دەيىن سوزىلادى»، - دەيدى فەستيۆالدىڭ قويۋشى باس رەجيسەرى اسحات ماەميروۆ.
الاڭداعى كوڭىلدى جۇرتتىڭ اراسىنان الەمدىك جانە ءداستۇرلى ءدىن كوشباسشىلارىنىڭ Ⅶسەزىنە يتاليادان كەلگەن قوناقتاردى جولىقتىردىق.
«ءبىز يتاليادان ريم پاپاسىنىڭ وسى ساپارىن ۇيىمداستىرۋشى ءدىن قىزمەتكەرىنىڭ دەلەگاتسياسىمەن كەلدىك. كەشە كەلگەندىكتەن قالانى ءبىراز ارالاپ ۇلگەردىك. قالاقاتتى ۇنادى. قازاقتار قوناقجايلىق تانىتىپ اتىر. ءوز ۇيىمىزدە جۇرگەندەيمىز.
«بايتەرەك» الدىنداعى شارا ۇناپ جاتىر. ءداستۇرل ىاندەردى تىڭداپ، جەرگىلىكتى مادەنيەتتىڭ ەرەكشەلىكتەرىمەن تانىستىق. سالت- داستۇرلەرىڭىزدى ماقتان تۇتادى ەكەنسىزدەر، بۇل وتە جاقسى. ازىرگە تەك جاعىمدى اسەر الىپ جاتىرمىز. اۋا رايى دا قوناقتاردىڭ قاباعىنا قاراپ تۇرعان سياقتى. قاراشا ايى كەزىندەگى ميلاندا جۇرگەن سياقتىمىز. ارامىزدا ءبىر ادام عانا كۇننىڭ سۋىقتىعىنا شاعىمدانىپ ءجۇر»، - دەپ كۇلدى دەلەگاتسيا مۇشەسى.
