زاماناۋي قازاق ادەبيەتى: بالالارعا ارنالعان 5 شىعارما
بالالارعا ارناپ شىعارما جازۋ، ۇلكەندەرگە ارناپ جازعاننان گورى قيىن. بالالار ادەبيەتىندە دالدىك پەن بارلىق سۇراققا جاۋاپ بەرۋ تالاپ ەتىلەدى.
«بالالاردى قورعاۋ» كۇنىنە وراي كەيىنگى ۋاقىتتا قازاق تىلىندە بالالارعا ارناپ جازىلعان شىعارمالاردى ۇسىنامىز.
ساۋلە دوسجانوۆا - «ءبىرتۋار»
«ءبىرتۋار» كىتابى داڭقتى سپورتشى، ماسكەۋ وليمپياداسىنىڭ جۇلدەگەرى، قازاقستاننىڭ ەڭبەك ەرى جاقسىلىق ۇشكەمپىروۆتىڭ ءومىر جولى تۋرالى جازىلعان. قازاق باتىرىنىڭ تاريحى ارقىلى جاس ۇرپاقتىڭ بويىنا سپورتقا، وتانعا دەگەن سۇيىسپەنشىلىكتى تاربيەلەۋگە بولادى.
«جاقسىلىق ۇشكەمپىروۆتى جەكە بىلەتىن بولعاندىقتان ونىڭ جەتىستىكتەرى تۋرالى جازۋدى وزىمە پارىز سانادىم. قازىرگى زاماندا ارامىزدا باتىرلار بار ما دەپ ويلايتىندار كوپ. مىنە، جاۋاپ. جاقسىلىق ۇشكەمپىروۆ - تاۋەلسىز قازاقستاننىڭ تۇڭعىش باتىرى. ەلىمىزدىڭ عانا ەمەس، بۇكىل حالىقتىڭ ابىرويىن اسقاقتاتتى»، - دەيدى كىتاپ اۆتورى.
كىتاپ بالالاردى سپورتقا باۋلىپ، شىنىعىپ وسۋگە ۇيرەتەدى.
ليليا كالاۋس. زيرا ناۋرىزبايەۆا - «التىن توستاعاندى ىزدەۋ»
بالالار بۇل كىتاپ ارقىلى ماسساگەتتەردىڭ حانزاداسى اسپارامەن تانىسىپ، ونىمەن بىرگە ەرتە زاماندا جۇمباق جاعدايدا جوعالىپ كەتكەن دانالىق پەن ادىلەتتىڭ كيەلى التىن توستاعانىن ىزدەۋ ءۇشىن بىرگە ساياحاتتايدى. ىزدەۋ بارىسىندا ولار سامۇرىق سياقتى ميفولوگيالىق كەيىپكەرلەردى كەزدەستىرەدى. ول بالالارعا جاۋلاردىڭ ايلا- امالدارىن جەڭۋگە كومەكتەسەدى. كىتاپ كەيىپكەرلەرىن كۇتپەگەن ولجالار مەن جوعالتۋلار، ساتقىندىق پەن دوستاسۋ كۇتەدى. شىعارما بالالاردى جاۋاپتى، باتىل بولۋعا ۇيرەتەدى.
كەڭەس ورازبەك ۇلى - «تۇران باھادۇرلەرى»
ەر، بي، نار - باۋىرلار، قازىرگى زامان بالالارى. ۇركەرلىكتەر ولارعا «ءداۋىر ساعاتىن» سىيلايدى. سول «ساعاتپەن» ولار الىپ ەر توڭعا، اناحارسيس، توميريس، شىراق، سىپاتاي، مودە ءتاڭىرقۇت، اتتيلا، تونىكوك - كۇلتەگىن، ءال- فارابي، قايىر حان (وتىرار قورعانىسى)، وتەيبويداق شيپاگەر، تاۋكە حان - قوجابەرگەن باتىر زاماندارىنا «ساپار شەگەدى». اتا- بابالارىمىزدىڭ تاريحىمەن، وركەنيەتىمەن تانىسىپ، ماقتانىشقا كەنەلەدى. وزدەرى دە تاريحي، ەرلىك جورىقتارعا قاتىسىپ، وتانشىلدىقتىڭ ۇلگى- ونەگەسىن كورسەتەدى.
بەيبىت سارىباي - «اقتابان»
«ءيت - جەتى قازىنانىڭ ءبىرى». كوشپەندى قازاق تۇرمىسىندا ءيتتىڭ الاتىن ورنى ەرەكشە. اسىرەسە، مالشىلاردىڭ سەنىمدى سەرىگى. ولاردىڭ ايتۋىنشا يتتەردىڭ قاسقىرعا قارسى ۇرگەن دىبىسى جاي كەزدەرى ۇرگەنىنەن باسقاشا بولادى ەكەن. ساناۋلى كۇننەن سوڭ ءيت جىلى ەسىگىمىزدەن ەنگەلى تۇر. قازاق ادەبيەتىندە ءيت تۋرالى شىعارمالار جەتەرلىك. سولاردىڭ ءبىرى تالانتتى جازۋشى بەيبىت سارىبايدىڭ «اقتابان» اتتى حيكاياتى. بۇلاردان بولەك جيناققا اۆتوردىڭ بىرنەشە اڭگىمەلەرى ەنگەن. بارلىق شىعارما اۋىل ومىرىندەگى قىزىقتاردى باياندايدى. «اقتابان» حيكاياتى جاڭا اۋىلعا كوشىپ كەلگەن بالانىڭ يتپەن دوستىعىن سۋرەتتەيدى. كىتاپتىڭ ءتىلى جەڭىل.
سىرمانوۆ الپامىس: «سارمان: التى تاڭبانىڭ كىتابى»
جاقىندا سىرمانوۆ الپامىستىڭ «سارمان: التى تاڭبانىڭ كىتابى» اتتى بالالارعا ارنالعان فەنتەزي جانرىنداعى رومانى جارىق كوردى. الپامىس ادەبيەت تابالدىرىن ەندى اتتاپ جاتقان جاس قالامگەر.
وقيعا ورتا عاسىرداعى «تۇران» اتتى مەملەكەتتە وتەدى. ول جەردەگى «ولمەيتىن حان» اتانعان - «تارىن»، تاقتا ماڭگى وتىرۋ ءۇشىن الەمدى جويىپ جىبەرۋدەن دە تايىنبايدى. وعان قارسى تۇرۋ ءۇشىن الىپ كۇشتىڭ يەسى - «تابۋراتتار»، اقىل- ويدىڭ يەسى - «ماردارلار» جانە سۋپەر كۇشكە يە - «سارماندار» بىرىگەدى. جالپى، كىتاپ وتە قىزىقتى، شىتىرمان وقيعالى. ناعىز بالالارعا ارنالعان.
massaget.kz
