اسكەريلەردىڭ زەينەتكە شىعۋ جاسىن 5 جىلعا سوزۋعا بولادى – مينيسترلىك

بۇل تۋرالى ونلاين- بريفينگىدە قورعانىس مينيسترلىگى زەينەتاقىمەن قامسىزداندىرۋ ورتالىعىنىڭ باستىعى پولكوۆنيك قايىرجان بيمولدين ءمالىم ەتتى، دەپ حابارلايدى قازاقپارات.

«ۇكىمەت بەكىتكەن ەڭ باستى نورما - بارلىق اسكەري قىزمەتشىلەر مەملەكەتتىك بيۋدجەت ارقىلى زەينەتاقى تاعايىنداۋ جۇيەسىنە كوشتى. بۇرىن 2016 -جىلعا دەيىن جيناقتاۋ جۇيەسىندە بولعانبىز. بۇل - وتە جاقسى جەتىستىك دەپ ويلايمىن. زەينەت جاسى بويىنشا ۇزارتۋ «اسكەري قىزمەتشىلەردىڭ مارتەبەسى تۋرالى» زاڭدا قاراستىرىلعان. بيىل ول زاڭعا وزگەرىستەر ەنگىزىلدى. سوعان سايكەس، اسكەري قىزمەتشىنىڭ جاسىن 5 جىلعا دەيىن سوزۋعا بولادى»، - دەدى قايىرجان بيمولدين.

سونداي- اق، ورتالىق باستىعى اسكەري قىزمەتشىلەردىڭ زەينەتاقىسى قالاي ەسەپتەلەتىنىن دە ءتۇسىندىرىپ ءوتتى.

«اسكەري قىزمەتشىلەرگە زەينەتاقى تاعايىنداۋ نورمالارى «قازاقستان رەسپۋبليكاسىنىڭ زەينەتاقى تۋرالى» زاڭىندا قاراستىرىلعان. ول اسكەري قىزمەتشىنىڭ ەڭبەك وتىلىنە تىكەلەي بايلانىستى. ناقتى ايتساق، ەگەر 25 جىل ەڭبەك ءوتىلى بولسا، اسكەري قىزمەتشىگە 50 پايىز زەينەتاقى تاعايىندالادى. ال 25 تەن استام ءار جىلعا 2 پايىزدان قوسىلىپ وتىرادى. مىسالى، 30 جىل ەڭبەك ءوتىلى بار اسكەري قىزمەتشىگە ءوزىنىڭ الىپ وتىرعان جالاقىسىنىڭ 60 پايىز زەينەتاقى تاعايىندالادى»، - دەدى ول.

ايتۋىنشا، «سيفرلىق قازاقستان» باعدارلاماسى شەڭبەرىندە مينيسترلىكتىڭ اسكەري قىزمەتشىلەردى زەينەتاقىمەن قامسىزداندىرۋ پروتسەستەرى اۆتوماتتاندىرىلعان.

«ونىڭ ىشىندە زەينەتاقى تاعايىنداۋ، قايتا قاراۋ، جاڭعىرتۋ پروتسەستەرى اۆتوماتتاندىرىلدى. بۇرىنعى جۇيە بويىنشا مۇنىڭ ءبارى قولمەن ىستەلىنەتىن. زەينەتاقى تولەمدەرىنىڭ كوشىرمەلەرى پوشتا ارقىلى جىبەرىلەتىن. بۇگىندە ينتەگراتسيالىق جۇيە بويىنشا بىرنەشە سەكۋندتىڭ ىشىندە جەتەدى. بۇرىن تاعايىنداۋ تۋرالى قۇجاتتار 2 ايدىڭ ىشىندە پوشتامەن بارىپ جاتسا، قازىر ەكى جۇما، ءبىر ايدىڭ ىشىندە ىسكە اساتىن جاعدايعا جەتتى»، - دەدى ورتالىق باستىعى.

ەسكە سالساق، ەلىمىزدىڭ بىرنەشە قالاسىندا اسكەري وركەسترلەر شەرۋى ءوتتى.

اۆتور: گۇلنۇر قالدىبايەۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى