اباي شاحتاسىنداعى قايعىلى وقيعا: 5 كەنشىنى جەرلەۋ ءراسىمى ءوتتى - ۆيدەو

ەرتەڭ تاعى ءبىر شاحتەرمەن قوشتاسۋ ءراسىمى وتەدى، دەپ حابارلايدى قازاقپارات ءتىلشىسى.

بۇگىن اباي قالاسىندا شاحتادا مەتاننىڭ تارالۋىنان قازا تاپقان كەنشىلەرمەن قوشتاسۋ ءراسىمى ءوتتى. ونىڭ ىشىندەگى ەڭ جاسى - 31 جاستا، ەڭ ۇلكەنى - 53 تە ەدى.

«بۇل - ءبارىمىز ءۇشىن ورنى تولماس قايعى. ءبىز بۇگىن باۋىرلارىمىز بەن ۇلدارىمىزدى جەرلەپ جاتىرمىز. مەن 71 جاستامىن، ءبىراق وكىنىشكە قاراي، جاس جىگىتتەرمەن قوشتاسۋعا كەلىپ تۇرمىن. ءبىزدىڭ جۇمىسىمىز وتە قاۋىپتى. مۇنداي قايعىلى جاعدايدىڭ الدىن الۋ مۇمكىن ەمەس. شاحتادا جۇمىس ىستەيتىندەردىڭ ءبارى ءبىزدىڭ جۇمىسىمىز اسا قاۋىپتى ەكەنىن بىلەدى»، - دەيدى ارداگەر شاحتەر ۆيكتور كازاكوۆ.

«ارسەلورميتتال تەمىرتاۋ» باس ديرەكتورى قازا تاپقاندار مەن زارداپ شەككەندەردىڭ وتباسىلارى كومپانيادان تولىق مورالدىق جانە ماتەريالدىق قولداۋ الاتىنىنا سەندىردى. «ءبىز وتباسىلارعا كومەك كورسەتۋ ءۇشىن ءار ۇيەلمەنگە جاۋاپتى تۇلعالاردى تاعايىندادىق. ءبىز سونداي- اق زارداپ شەككەندەرگە قامقورلىق جاسايمىز. ولارعا مەديتسينالىق جانە باسقا دا كومەك كورسەتەمىز. كوميسسيا جۇمىس ىستەيدى. ءبىز بولعان وقيعانى تەرگەۋ بارىسىندا كوميسسياعا جان-جاقتى قولداۋ كورسەتەمىز. مەملەكەتتىك كوميسسيانىڭ تەرگەۋى اياقتالعانعا دەيىن بىزگە ىشكى تەرگەۋ جۇرگىزۋگە رۇقسات جوق»، - دەدى «ارسەلورميتتال تەمىرتاۋ» ا ق باس ديرەكتورى بيدجۋ ناير.

سونداي-اق كومپانيا باسشىلىعى قازا تاپقانداردىڭ بالالارى مەن وتباسىلارىنا وقۋ اقىسىن تولەۋ جانە نەسيەلەرىن وتەۋ بويىنشا كومەك كورسەتۋگە مىندەتتەنەدى.

«وقۋعا قاتىستى بىزدە 20 جاسقا دەيىن ۋنيۆەرسيتەتتە وقۋعا قاراجات بەرۋ تۋرالى مىندەتتەمە بار. ماسەلە قازىر تالقىلانىپ جاتىر. ءار وتباسىنا جەرلەۋ، قوناق اسىن ۇيىمداستىرۋ سياقتى بارلىق مىندەتتەرمەن اينالىساتىن مامان تاعايىندالادى. كومپانيا ولاردىڭ نەسيەسىن وتەۋدى ءوز موينىنا الادى. كومپانيا قازا تاپقانداردىڭ وتباسىنا ون جىلدىق جالاقى تولەۋ بويىنشا مىندەتتەمە الدى»، - دەدى «ارسەلورميتتال تەمىرتاۋ» ا ق اتقارۋشى ديرەكتورى الىشەر ابەنوۆ.

ەسكە سالايىق، 7-قاراشا كۇنى ساعات 08:24-تە «ارسەلورميتتال تەمىرتاۋ» اق كومىر دەپارتامەنتىنىڭ «اباي» شاحتاسىندا مەتان گازى تاراي باستاعان. بۇل ۋاقىتتا شاحتادا 64 ادام جۇمىس ىستەپ جاتقان، 54 ى ەۆاكۋاتسيالاندى. اپات سالدارىنان ەكى ادام زارداپ شەگىپ، التى كەنشى قازا تاپتى. زارداپ شەككەندەر اۋىر حالدە جانساقتاۋ بولىمىندە جاتىر. پرەزيدەنت قاسىم-جومارت توقايەۆ قازا تاپقان شاحتەرلەردىڭ جاقىندارى مەن تۋىستارىنا كوڭىل ايتتى.

سونداي-اق زارداپ شەككەن ازاماتتاردىڭ تەزىرەك ساۋىعىپ كەتۋىنە تىلەكتەستىك ءبىلدىردى. اپات سالدارىنان قازا بولعاندار مەن زارداپ شەككەندەردىڭ ەسىمى جاريالاندى. ق ر ت ج م باسشىسى يۋري يلين ب ا ق وكىلدەرىنە ارنالعان بريفينگىدە اپاتقا قاتىستى قىلمىستىق ءىس قوزعالعانىن ايتتى. كوز جۇمعان 6 كەنشى مەتان گازى تاراعان كەزدە قۇتقارۋ قۇرالىن كيىپ ۇلگەرمەي قالعان.

اۆتور: اگاتا مۋحامەدجانوۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى