موڭعوليادا 5 كۇندىك قاتاڭ كارانتين ورنادى
بۇل تۋرالى ۆيتسە- پرەمەر يا. سودبااتار مالىمدەدى، دەپ جازادى montsame.mn.
ۇكىمەت دۇنيەجۇزىلىك دەنساۋلىق ساقتاۋ ۇيىمى مەن موڭعوليانىڭ ۇلتتىق قاۋىپسىزدىك كەڭەسىنىڭ ۇسىنىستارىنا، وتاندىق عالىمدار مەن زەرتتەۋشىلەردىڭ پىكىرىنە جانە قاۋىپتى باعالاۋ ناتيجەلەرىنە سۇيەنە وتىرىپ، 12-قاراشا ساعات 06:00 دەن 17-قاراشا ساعات 06:00 گە دەيىن ەل اۋماعىندا قاتاڭ كارانتيندىك رەجيمدى ەنگىزۋدى دۇرىس دەپ تاپتى، - دەدى سودبااتار.
ۆيتسە- پرەمەر مالىمدەمەسىندە ەل قاتاڭ كارانتين رەجيمىنە نەمەسە اپاتتارعا جوعارى دايىندىقتىڭ ەكىنشى دەڭگەيىنە كوشەتىنىن اتاپ ءوتتى.
ونىڭ ايتۋىنشا، عالىمدار مەن زەرتتەۋشىلەر وسى كەزەڭدە كاسىبي جانە مامانداندىرىلعان مەملەكەتتىك مەكەمەلەر ەلدە كوروناۆيرۋستىق ينفەكتسيانىڭ تارالۋىن تولىق باقىلاۋعا الادى دەپ سانايدى.
ول ازاماتتارعا سانيتارلىق- ەپيدەميولوگيالىق ەرەجەلەردى ساقتاۋعا جانە ۇيدە بولۋعا، ال مەكەمەلەر مەن كومپانيالارعا جۇمىستى مۇمكىندىگىنشە قاشىقتان جۇمىس ىستەۋ فورماتىنا اۋىستىرۋعا كەڭەس بەردى.
ايتا كەتۋ كەرەك، ەلدىڭ جاپپاي قاتاڭ كارانتيندىك رەجيمگە كوشۋىنە بايلانىستى موڭعوليا استاناسىنىڭ التى اۋدانىندا پاترۋلدىك توپ جۇمىس ىستەي باستادى، ول ازاماتتاردىڭ كارانتيندىك شەكتەۋلەردى 5 كۇن بويى ساقتاۋىن باقىلايدى.
جۇمىسقا 400 دەن استام قىزمەتكەر جۇمىلدىرىلدى، ولاردىڭ قۇرامىنا ەسىرتكى باقىلاۋ، پوليتسيا جانە توتەنشە جاعدايلار قىزمەتكەرلەرى كىردى.
ازاماتتارعا كارانتين رەجيمىن ساقتاۋ، اسا قاجەت بولماعان جاعدايدا ۇيدەن شىقپاۋ، ۇنەمى مەديتسينالىق قورعانىس ماسكالارىن تاعۋ، سانيتارلىق- گيگيەنالىق نورمالاردى ساقتاۋ، قولدى ءجيى جۋۋ جانە قاجەتتى قاشىقتىقتى ساقتاۋ ۇسىنىلادى.
ەسكە سالايىق، موڭعوليادا سوڭعى تاۋلىكتە بارلىعى 644 سىناق وتكىزىلىپ، ناتيجەسىندە كوروناۆيرۋستىق ينفەكتسيانىڭ 24 جاعدايى انىقتالدى.
ولاردىڭ ىشىندە 22-قازاندا موڭعول- رەسەي شەكاراسىنداعى «التانبۋلاگ» وتكىزۋ پۋنكتى ارقىلى شەكارادان وتكەن ءبىر ادام، 10-قاراشادا «التانبۋلاگ» ارقىلى ەلگە كىرگەن ءبىر جۇك كولىگى جۇرگىزۋشىسى، سەۋلدەن ورالعان 5 ادام جانە ءۇندىستاننان شىعارىلعان 3 ادام، سونداي- اق باقىلاۋ تەستىمەن قامتىلعان 3 ادام بار.
وسىلايشا، ەلدە كوروناۆيرۋس ينفەكتسياسىن جۇقتىرعاندىڭ جالپى سانى 406 ادامعا جەتتى، ونىڭ ىشىندە 317 ادام جازىلىپ شىقسا، 84 ادام عىلىمي- زەرتتەۋ ورتالىعىندا ەمدەلۋدە. 72 ناۋقاس اۋرۋدىڭ جەڭىل ءتۇرى بايقالسا، 10 پاتسيەنتتىڭ جاعدايى ورتاشا، ال ەكى ناۋقاس اۋرۋدىڭ اۋىر تۇرىنە شالدىققان.
BAQ. KZ
