قازاقپارات كۇنتىزبەسى. 5- قىركۇيەك
قازاقپارات كۇنتىزبەسى قازاقستان حالقى تىلدەرى كۇنى
2017 -جىلعى «قازاقستان رەسپۋبليكاسىندا مەرەكە كۇندەر تىزبەسىن بەكىتۋ تۋرالى» ۇكىمەتتىڭ قاۋلىسىنا سايكەس، قازاقستان حالقى تىلدەرى كۇنى 5 - قىركۇيەكتە تويلانادى. بۇعان دەيىن تىلدەر مەرەكەسى 22 - قىركۇيەكتە اتاپ وتىلەتىن. 5 - قىركۇيەككە اۋىستىرۋ سەبەبى - بۇل كۇنى ۇلت ۇستازى احمەت بايتۇرسىن ۇلىنىڭ تۋعان كۇنى.
حالىقارالىق قايىرىمدىلىق كۇنى
1997 -جىلدىڭ 5 - قىركۇيەگىندە ۇزاق مەرزىمدى دەرتكە شالدىققان، الەمدەگى اتاقتى ايەلدەردىڭ ءبىرى كالكۋتتالىق تەرەزا انا قايتىس بولدى. ول ءدۇيىم جۇرتقا ءوزىنىڭ قايىرىمدىلىق ارەكەتتەرىمەن تانىلعان بولاتىن. تەرەزا انانىڭ ەرەن ەڭبەگىن ەسكەرە وتىرىپ، ب ۇ ۇ باس اسسامبلەياسى 5 - قىركۇيەكتى حالىقارالىق قايىرىمدىلىق كۇنى دەپ بەكىتتى.
ەستە قالار وقيعالار
1933 -جىلى الماتىدا م. لەرمونتوۆ اتىنداعى رەسپۋبليكالىق ورىس دراما تەاترى اشىلدى. بۇل قازاقستانداعى بايىرعى، ەڭ ۇلكەن تەاترلاردىڭ ءبىرى. تەاتر ۇجىمى العاش سەمەيدە ۇيىمداستىرىلىپ، كەيىن الماتىعا اۋىستىرىلعان.
1964 -جىلى ورىس اقىنى م. لەرمونتوۆتىڭ 150 جىلدىق مەرەيتويىنا وراي تەاترعا ونىڭ ەسىمى بەرىلدى.
2001 -جىلى پاۆلودار قالاسىندا ءماشھۇر ءجۇسىپ مەشىتىنىڭ اشىلۋ سالتاناتى بولدى. مەشىت سەگىز قىرلى، بۇل - دەشتى قىپشاق ساۋلەت ۇلگىسىنە جاتادى. ونىڭ ۇستىندەگى 8 قىرلى جۇلدىز - تۇركى جۇرتىنىڭ ورتاق ءرامىزى. كۇمبەزى - شاڭىراق ۇلگىسىندە، 4 مۇنارانىڭ ۇزىندىعى پايعامبار جاسىنا وراي 63 مەتر. ءبىر مەزگىلدە 1500 ادام نامازعا جىعىلۋعا مۇمكىندىگى بار. ۇلكەن زالداعى گاۋھار تاستى شامنىڭ سالماعى 3,5 توننا، بيىكتىگى 16,5 مەتر، ەنى 6 مەتر.
2009 - جىلى تۇڭعىش رەت قازاق كۇيى ماسكەۋدەگى قىزىل الاڭدا وتكەن «سپاسسكايا باشنيا» حالىقارالىق اسكەري- مۋزىكالىق فەستيۆالىندە ورىندالدى. قازاقستاندىق ۇلاندار دومبىرامەن قۇرمانعازىنىڭ كۇيلەرىن ناقىشىنا كەلتىرە ورىنداپ، كورەرمەندى ءتانتى ەتتى.
2012 - جىلى مەملەكەت باسشىسى نۇرسۇلتان نازاربايەۆتىڭ ينتەراكتيۆتى ءدارىسى اياسىندا نازاربايەۆ ۋنيۆەرسيتەتىندە ورتا جانە جوعارى ءبىلىم بەرۋ مەنەدجەرلەرىن وقىتاتىن جوعارى ءبىلىم مەكتەبى اشىلدى.
2014 - جىلى قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ «2015 -جىلدى قازاقستان حالقى اسسامبلەياسىنىڭ جىلى دەپ جاريالاۋ تۋرالى» جارلىققا قول قويدى.
2014 - جىلى قازاقتىڭ ءبىرتۋار ۇلى، ءىرى تۇلعا، قالامگەر، دراماتۋرگ، الاشوردا قايراتكەرى جۇسىپبەك ايماۋىتوۆتىڭ كىندىك قانى تامعان جەرىنەن ءبىر ۋىس توپىراق جازۋشى جەرلەنگەن ماسكەۋ قالاسىنداعى ۆاگانكوۆسكيي زيراتىنا كومىلدى. رەپرەسسياعا ۇشىراعان قازاق جازۋشىسى ج. ايماۋىتوۆتىڭ جەرلەنگەن جەرى 2014 -جىلى عانا بەلگىلى بولدى.
2015 - جىلى الماتىدا «الماتىنىڭ ءدامىن تاتىپ كور!» قالالىق تاعام فەستيۆالى ءوتتى. بيلەتتەردى ساتۋدان جينالعان بارلىق قاراجات قازاقستاننىڭ قىزىل جارتى اي قوعامىنا بەرىلدى. قايىرىمدىلىق سوماسى ت ج ورنىندا العاشقىلاردىڭ ءبىرى بولىپ تابىلعان جانە اپاتتاردىڭ سالدارىن جويۋعا كومەكتەسەتىن ۆولونتەرلىك كوماندالاردى جابدىقتاۋعا باعىتتالدى. فەستيۆالدە 14 قوعامدىق تاماقتانۋ ۇيىمى ءوز تاعامدارىن ۇسىندى، ولاردىڭ ىشىندە مەيرامحانالار، كوفەحانالار، ناۋبايحانالار، اسپازدىق ستارتاپتار جانە وتاندىق برەندتەر بار.
2016 - جىلى الماتىداعى «شىمبۇلاق» تاۋ- شاڭعى شيپاجايىندا الماتى قالاسىنىڭ 1000 جىلدىعى مەن ەل تاۋەلسىزدىگىنىڭ 25 جىلدىعىنا ارنالعان العاش رەت «Almaty Mount Fest 2016» حالىقارالىق فەستيۆالى ءوتتى.
2019 - جىلى نۇر- سۇلتاندا «Qazaqstan jastar Fest – 2019» سپورتتىق جاستار فەستيۆالى اشىلدى. فەستيۆالگە قاتىسۋشى جاس كاراتەشىلەر، گرەپپلينگ شەبەرلەرىن ونەرلەرىن ورتاعا سالىپ، ۇلتتىق سپورت تۇرلەرى بويىنشا بەس اسىق، اسىق اتۋ، ارقان تارتۋ، گىر كوتەرۋدەن جارىستار ۇيىمداستىرىلدى.
اۆتور: بالنۇر قوجاگەلدى
