ەلوردادا 5 مىڭعا جۋىق وتباسى الەۋمەتتىك ماڭىزى بار ازىق- تۇلىك پاكەتىن الدى
«بيىل 19 - ناۋرىزدا ەلباسى نۇرسۇلتان نازاربايەۆ «ءبىز بىرگەمىز» اكتسياسىن جاريالاعان ەدى. وسىلايشا، ارنايى قور قۇرىلىپ، ومىرلىك قيىن جاعدايعا تاپ بولعان، از قامتىلعان، كوپبالالى وتباسىلارعا، قارت ادامدارعا كومەك كورسەتىلىپ كەلەدى. رەسپۋبليكا بويىنشا 155 مىڭ وتباسىنا جانە استانالىق 20 مىڭ دارىگەرگە 50 مىڭ تەڭگەدەن بەرىلدى. ەلوردادا 5 مىڭعا جۋىق وتباسى الەۋمەتتىك ماڭىزى بار ازىق- تۇلىك پاكەتىن الدى» ، - دەپ اتاپ ءوتتى «Zhas Otan» جاستار قاناتىنىڭ باسپا ءسوز حاتشىسى ەرسايىن ءامرين.
ونىڭ ايتۋىنشا، ازىق- تۇلىك پاكەتىن تاراتۋدىڭ ەكىنشى كەزەڭى قولعا الىندى. وسىلايشا، تاعى 6 مىڭ وتباسى قاجەتتى ازىق- تۇلىكپەن قامتاماسىز ەتىلمەك. «ءاربىر پاكەتتە ۇن، قانت، ماكارون، كۇرىش، ماي، تۇز، ءشاي سىندى 14 اتاۋلى ەڭ قاجەتتى ازىق- تۇلىك بار. وعان ديستريبيۋتور بولىپ «ماگنۋم» ساۋدا جەلىسى بەكىتىلدى. سونداي- اق، قور قاراجاتىنا نۇر- سۇلتان، الماتى، شىمكەنت قالالارىنا 5 ميلليون مەديتسينالىق ماسكا العان ەدى. ازىق- تۇلىك پاكەتتەرىنە دە 50 دانا ماسكادان سالىنعان» ، - دەيدى سپيكەر.
ازىق- تۇلىكتى ولشەپ، قاپتاپ، كولىككە تيەپ، جەتكىزۋ جۇمىستارىن 300 گە جۋىق جاس وتاندىق ەرىكتى تەگىن اتقارىپ كەلەدى.
«كۇن سايىن قالا اكىمدىگى بەرگەن ءتىزىم بويىنشا ازىق- تۇلىك پاكەتىن ءار ءۇيدىڭ الدىنا دەيىن جەتكىزەمىز جانە ءۇي يەسىمەن ارا قاشىقتىقتى ساقتايمىز. بۇل كومەكتى دە ادامدار ءارتۇرلى قابىلدايدى. كوپشىلىگى قۋانىشپەن العىستارىن جەتكىزەدى جانە كەشىكتىڭدەر دەپ سىنعا الاتىندار دا بارشىلىق. ويتكەنى، بىزگە ەرىكتىلەر سانى جەتىسپەيدى. جالپى ازىق- تۇلىك پاكەتى كوپبالالى، اسىراۋشىسىنان ايىرىلعان، مۇگەدەك بالا تاربيەلەپ وتىرعان نەمەسە جۇمىسسىز وتباسىلارعا بەرىلەدى» ، - دەپ ءتۇسىندىردى ە. ءامرين.
سونىمەن بىرگە، ازىق- تۇلىك پاكەتىن ازىرلەۋگە ءبىرقاتار ونەر جۇلدىزدارى كومەكتەستى. ولاردىڭ قاتارىندا جەڭىس سەيدوللا ۇلى، مارجان اراپبايەۆا جانە ءادىل احمەتوۆ بار. «قايىرىمدىلىق - جۇرەكتىڭ جىلۋىن سىيلاي ءبىلۋ دەپ ايتادى. سوندىقتان، بۇل - ەڭ ۇلى قاسيەتتىڭ ءبىرى. وسىنداي سىن- ساعاتتا قايىرىمدىلىق جاساپ، بىرلىگىمىزدى كورسەتكەنىمىز دۇرىس دەپ ويلايمىز. ىنتىماق، سابىرلىق، شىدامدىلىق - ءبىزدىڭ قانىمىزدا بار قاسيەتتى دۇنيە. مۇقتاج ادامدارعا قايىرىمدىلىق كورسەتىپ، ازىق- تۇلىك جەتكىزۋدى سىزدەر مەن ءبىزدىڭ قوسىلىپ جاساپ جاتقانىمىزعا قۋانىشتىمىز. مىقتى بولايىق، ءبىر- بىرىمىزگە جاقىن بولايىق. قازاقشا ايتقاندا، ىندەتتىڭ كوبى كەتىپ، ازى قالدى. ەڭ باستىسى، ءتارتىپتى ساقتاپ، مۇمكىندىگىنشە ۇيدەن شىقپاي، ءسال شىداساق، ىندەتتى جەڭەتىنىمىزگە سەنەمىن. جەكە ءوزىم «Nur Otan» پارتياسىنىڭ مۇشەسى رەتىندە، سوسىن «Zhas Otan» جاستارى جاساپ جاتىر دەگەن سوڭ، جاستارعا ۇلگى كورسەتۋ ءۇشىن ۇسىنىستى قۋانا قابىلدادىم» ، - دەدى كومپوزيتور، «قازاقكونتسەرت» مەملەكەتتىك كونتسەرتتىڭ ۇيىمىنىڭ باسشىسى جەڭىس سەيدوللا ۇلى. ۇيىمداستىرۋشىلاردىڭ ايتۋىنشا، اتالعان اكتسيا مامىر ايىنىڭ ورتاسىنا دەيىن جالعاسادى.
