ەلوردادا كوروناۆيرۋس جۇقتىرعان 5 ناۋقاستىڭ جاعدايى اۋىر - ساۋلە قيسىقوۆا

بۇل تۋرالى ورتالىق كوممۋنيكاتسيالار قىزمەتىندەگى بريفينگتە نۇر-سۇلتان قالالىق قوعامدىق دەنساۋلىق ساقتاۋ باسقارماسىنىڭ باسشىسى ساۋلە قيسىقوۆا ايتتى، دەپ حابارلايدى قازاقپارات ءتىلشىسى.

«ەلوردامىزدا ۆيرۋستى جۇقتىرعانداردىڭ سانى 222 گە جەتتى. ونىڭ ىشىندە 46 پايىزى ەر، 54 پايىزى ايەل ادامدار جانە 43 پايىزى 30-49 جاسقا دەيىنگى ازاماتتار، 27 پايىزى 18-29 جاسقا دەيىنگىلەر، 17 پايىزى 50-59 جاستاعىلار، 9 پايىزى 60-69 ارالىعىنداعى ازاماتتار، 1 پايىزى 70 جانە ودان جوعارى جاستاعىلار، 3 پايىزى 18-گە تولماعان بالالار»، - دەدى ول.

باسقارما باسشىسىنىڭ دەرەگىنشە، جالپى جازىلىپ شىققانداردىڭ سانى 28 ادامعا نەمەسە 13 پايىزعا جەتتى. قازىرگى ۋاقىتتا اۋرۋحانالاردا 493 ناۋقاس ەم الىپ جاتسا، ونىڭ 203 ى كوروناۆيرۋستان ەمالۋ ۇستىندە.

«ونىڭ ىشىندە 10 ناۋقاس - اقمولا وبلىسىنىڭ تۇرعىنى. سونىمەن قاتار 5 ناۋقاستىڭ جاعدايى اۋىر حالدە. ۇشەۋى جاساندى وكپە جەلدەتۋ اپپاراتىنا قوسىلعان. بەكىتىلگەن حاتتاماعا سايكەس ءتيىستى ەم جۇرگىزىلىپ جاتىر. باسقا ناۋقاستاردىڭ جاعدايى قالىپتى. نۇر-سۇلتان قالاسىندا 28-قاڭتاردان باستاپ 6 315 ادام باقىلاۋدان جانە ەمدەۋدەن ءوتتى. ونىڭ 202 سى – 18 گە تولماعان بالالار»، - دەدى ساۋلە قيسىقوۆا.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى