قاراشىعاناقتا مۇناي ءوندىرىسىن ۇلعايتۋعا 5 ميلليارد تەڭگە باعىتتالماق
«الدىمەن، قۇنى 36,8 ميلليارد ا ق ش دوللارى تۇراتىن (ونىڭ ىشىندە 32 پايىزى، 12 ميلليارد ا ق ش دوللارى قازاقستاندىق ۇلەسكە تيەسىلى) تەڭىزدە بۇگىنگى تاڭدا 46 مىڭنان استام قازاقستاندىق جۇمىس ىستەيدى. 400-دەن استام وتاندىق سەرۆيستىك كومپانيا قۇرىلىس، مەتال قۇرىلىمدارىن شىعارۋ جانە تاعى دا باسقا جۇمىستارعا تارتىلدى. ال قاشاعاندا تاۋلىگىنە 330 مىڭ باررەل كولەمىندە مۇناي تۇراقتى تۇردە ءوندىرىلىپ جاتىر. ءوندىرىستى ارتتىرۋ جوبالارى بەلسەندى تۇردە جالعاسۋدا. سونىمەن بىرگە، بولاشاقتا قاشاعان جوباسىن كەڭەيتۋ تۇجىرىمداماسى بويىنشا تالداۋ جۇمىستارى باستالدى. الدىن الا بولجام بويىنشا 2024 -جىلعا قاراي ءوندىرىس كولەمى تاۋلىگىنە 450 مىڭ باررەلگە جەتكىزىلمەك»، - دەدى قانات بوزىمبايەۆ و ق ك- دا وتكەن باسپا ءسوز ءماسليحاتىندا.
ءمينيستردىڭ ايتۋىنا قاراعاندا، قاراشىعاناق جوباسى بويىنشا قاراشىعاناق كونسورتسيۋمىنىڭ اكسيونەرلەرى اراسىنداعى داۋ شەشىلىپ، ءتيىستى كەلىسىمگە قول قويىلعان.
«1,1 ميلليارد كولەمىندە (2019-2021 -جىلدارى) شىعىندى وتەۋدى جانە 2037 -جىلعا دەيىن مۇناي باعاسى باررەلىنە 60 دوللار بولعان جاعدايدا رەسپۋبليكانىڭ ۇلەسىن 360 ميلليون ا ق ش دوللارىنا ۇلعايتۋ تۋرالى نەگىزگى ۋاعدالاستىقتارعا قول جەتكىزىلدى. سونىمەن قاتار، قاراشىعاناقتا ۇزاق مەرزىمگە مۇناي ءوندىرۋدىڭ جوعارى دەڭگەيىن ساقتاۋ ءۇشىن جاڭا ۇڭعىمالاردى بۇرعىلاۋ، كەڭەيتۋ جۇمىستارىنا الداعى 5 جىلدا 5 ميلليارد ا ق ش دوللارى ينۆەستيتسيا باعىتالاتىن بولادى»، - دەيدى ول.
قانات بوزىمبايەۆ اتاپ وتكەندەي، 2018 -جىلى جەر قويناۋى جانە جەر قويناۋىن پايدالانۋ تۋرالى كودەكس پەن سالىق كودەكسىنىڭ جاڭا نورمالار كۇشىنە ەنگەن. وسى زاڭنامالىق وزگەرىستەر جەر قويناۋى سالاسىنىڭ، سونىڭ ىشىندە تەڭىز جوبالارىن ينۆەستيتسيالاۋداعى تارتىمدىلىقتى كۇشەيتىپ وتىر. سوعان بايلانىستى، قازمۇنايگاز بەن ENI كومپانياسىمەن يساتاي جوباسىن ىسكە اسىرۋدى باستاپ كەتكەن.
« ENI كومپانياسىمەن اباي جوباسى جانە لۋكويل كومپانياسىمەن كاسپي تەڭىزىنىڭ قازاقستاندىق سەكتورىنداعى جەڭىس جوباسىنا قاتىستى كەلىسىمدەردىڭ شارتتارى تالقىلانىپ جاتىر. وسىنداي جوبالاردى جۇزەگە اسىرۋدىڭ ارقاسىندا ينۆەستيتسيالاردى تارتۋعا، ءوندىرىس كولەمىن ارتتىرىپ، سالىق ءتۇسىمىن قامتاماسىز ەتۋگە مۇمكىندىك زور»، - دەدى قانات بوزىمبايەۆ.
اۆتور: ايان بەكەن ۇلى
