اتىراۋداعى جايىق وزەنىنەن 5 توننا ءولى بالىق جينالدى
«قازىرگى تاڭدا وڭىردە ۆەدومستۆوارالىق كوميسسيا بالىقتىڭ قىرىلۋ سەبەپتەرىن انىقتاۋعا كىرىسىپ كەتتى. ونىمەن قوسا، قىرىلعان بالىقتى جيناۋ جۇمىسى ءجۇرىپ جاتىر. وسى ۋاقىتقا دەيىن 5 توننا ءولى بالىق جينالدى»، - دەپ ءمالىم ەتتى ق ر اۋىل شارۋاشىلىعى مينيسترلىگى ورمان شارۋاشىلىعى جانە جانۋارلار الەمىن قورعاۋ كوميتەتىنىڭ باسپا ءسوز قىزمەتى.
كوميتەت مالىمەتىنشە، وزەن سۋىنان اممياك تابىلدى دەگەن اقپارات جالعان. نەگىزى اممياك سۋدان ەمەس، بالىقتان تابىلعان.
ەسكە سالا كەتەيىك، جايىق وزەنىندەگى بالىقتاردىڭ جاپپاي قىرىلۋ سەبەبىن انىقتاۋ ءۇشىن وزەنگە سۋ اعىزاتىن 4 كاسىپورىن تەكسەرىلىپ جاتىر. اتىراۋ وبلىستىق ەكولوگيا دەپارتامەنتى باس مەملەكەتتىك ينسپەكتورى قايراتقالي حايرۋللانىڭ ايتۋىنشا، ماماندار «اتىراۋ سۋ ارناسى» م ك ك، «اتىراۋ تەتس» ا ق، «بەكىرە بالىعىن وسىرەتىن ورال- اتىراۋ زاۋىتى» مەن «اتىراۋ بەكىرە بالىعى زاۋىتىن» تەكسەرۋدە.
بۇدان بۇرىن اتىراۋدا جايىق وزەنىندەگى بالىقتاردىڭ نەدەن قىرىلعانى ايتىلعان بولاتىن.
«جايىق وزەنىندەگى ولگەن بالىقتىڭ سىناماسىن زەرتحانادا تالداۋدان وتكىزگەندە، ودان اممياك تابىلدى. قازىرگى تاڭدا بۇل زاتتىڭ وزەنگە قالاي تۇسكەنى انىقتالىپ جاتىر»، - دەپ حابارلادى ۆەتەرينارلىق باقىلاۋ جانە قاداعالاۋ كوميتەتىنىڭ اۋماقتىق ينسپەكسياسىنىڭ باسشىسى عالىمبەك بيسەنعاليەۆ.
اۆتور: ا. سوكولوۆ
