ءسىز نەگە ۇندەمەيسىز؟ پسيحولوگتان 5 جاۋاپ
مىسالى، دوستارىڭىزبەن دەمالىسقا بارعاندا، جاڭادان قوسىلعان قىز-جىگىتتەردىڭ اراسىنان بىرەۋدى ۇناتتىڭىز دەلىك. ۇناتقان قىزىڭىزعا/جىگىتكە نە ايتارىڭىزدى بىلمەي، قىسىلىپ جۇرەسىز.
سول سياقتى ومىردە ءارتۇرلى جاعداي بولىپ تۇرادى. ۇنسىزدىكتىڭ ورىن الۋى سەبەبى نەدە؟ جانە ول ءبىزدىڭ ىشكى جان دۇنيەمىز بەن قوعاممەن قارىم- قاتىناسىمىزعا قالاي اسەر ەتەدى؟
نەگە ادامدار ۇندەمەيدى؟ بۇل سۇراقتىڭ جاۋابى 5 قاعيداعا نەگىزدەلگەن:
ادام نە ايتارىن بىلمەيدى
ءسىزدىڭ سۇراعىڭىزدى تۇسىنبەسە نە قالاي دۇرىس جاۋاپ بەرۋ كەرەكتىگىن بىلمەسە، ول ءۇنسىز قالادى. قاي- قايداعىنى ايتىپ، اداستىرعانشا ءۇنسىز قالۋدى ءجون كورەدى.
جاعدايدى قالاي تۇزەۋ كەرەكتىگىن بىلمەيدى
بەلگىلى ءبىر جاعدايدىڭ شەشىمىن تابا الماي، تىعىرىقتان شىعۋدىڭ امالىن بىلمەگەندىكتەن تۋىندايتىن ۇنسىزدىك. ادەتتە قاتە شەشىم ايتۋدان، قاتە نۇسقا ۇسىنۋدان جۇرەكسىنەتىن ادامدار وسىنداي جاعدايعا تاپ بولادى. باتىلىراق بولىڭىز.
ونى تىڭدامايدى
ورتاعا پىكىر سالىپ، ءوز ۇلەسىن قوسقىسى كەلگەن ۋاقىتتا ونى تىڭداماي، ەلەمەي جاتاتىن ادامدار بولادى. مۇنداي جاعدايدا ول قاپالانىپ، كوڭىلى قالىپ، ەندىگارى سويلەمەيتىندەي بولادى. بۇل دا مىنەزدىڭ ءبىر قىرى.
شارشادى
ادامداردىڭ ۇندەمەۋىنىڭ تاعى ءبىر سەبەبى - شارشاۋىندا. اۋىر كۇننەن كەيىن كەز كەلگەن ادام ەموتسيونالدىق تۇرعىدا ءوزىن وتە شارشاڭقى سەزىنەدى. ءتىپتى ەڭ جاقىن ادامىمەن دە سويلەي المايتىن، تىلدەسە المايتىن جاعدايدا بولادى. وسىنداي كەزدە ادامدى جايىنا قالدىرىپ، دەمالۋعا مۇمكىندىك بەرۋ كەرەك. ال «سەن مەنى سۇيەسىڭ بە؟»، «بۇگىن كۇنىڭ قالاي ءوتتى؟»، «كەشكى اسقا بارامىز دەپ ۋادە ەتىپ ەدىڭ عوي» دەگەن سوزدەرمەن مازاسىن الماڭىز.
ءسوزدى قاجەت ەتپەيتىن كەزدەر بولادى
جاقىندارىڭا قولداۋ كورسەتىپ، مورالدىق كومەك بەرۋگە كەيدە ءسوزدىڭ قاجەتى بولمايدى. سەبەبى ءبىراز جاعدايدىڭ الدىن الىپ ۇلگەرمەگەندىكتەن، ونى شەشۋ دە ازىرشە قيىن بولعاندىقتان، ءۇنسىز قولداپ، كومەكتەسە ءبىلۋىڭىز كەرەك.
ءار ادام جەكە تۇلعا. ۇنسىزدىك قانداي ادامدارعا ءتان؟ تۇيىقتاۋ، سابىرلى، بايسالدى، سالماقتى، قاتالداۋ مىنەزدى ادامدارعا ءتان. ءبىراق وسى اتالعان 5 مىنەز قىرى 5 ءتۇرلى ادامعا ءتان بولارى انىق.
ءبىرى تىم ۇيالشاق بولسا، ءبىرى ءوز پىكىرىن ايتۋعا جۇرەكسىنەتىن بولادى. ونداي ادامدارمەن تىلدەسۋ امالىن تاۋىپ، ارتىق سۇراق قويماۋ كەرەك.
ءوز پىكىرى، ويىمەن ءبولىسۋ - پسيحولوگيالىق دەنساۋلىقتىڭ نەگىزى ەكەنىن ۇمىتپاعايسىز. ەشكىم ءسىزدىڭ ويىڭىزدى «وقي» المايدى، سوندىقتان ونى ايتا ءبىلىڭىز. سوندا عانا قوعاممەن قارىم-قاتىناسىڭىز جاقسارا تۇسەدى.
