پرەزيدەنتتىڭ 5 الەۋمەتتىك باستاماسىن جۇزەگە اسىرۋدىڭ جول كارتاسى ازىرلەنەدى
«ەلباسىنىڭ الەۋمەتتىك باستامالارى بارشا قازاقستاندىقتار ءۇشىن اسا ماڭىزدى. سوندىقتان ءبىز ونى ىسكە اسىرۋعا ۇلكەن جاۋاپكەرشىلىكپەن قاراۋىمىز كەرەك. مۇددەلى مەملەكەتتىك ورگاندارعا پارلامەنت قاراۋىنا ەنگىزۋ ءۇشىن قاجەتتى زاڭنامالىق وزگەرىستەردى ناۋرىز ايىنىڭ سوڭىنا دەيىن ازىرلەۋدى تاپسىرامىن. بۇل جۇمىس پارلامەنتتىڭ جازعى سەسسياسى اياسىندا اياقتالۋى ءتيىس. پارلامەنت بىزدەن بۇل زاڭ جوبالارىن كۇتىپ وتىر»، - دەدى پرەمەر- مينيستر.
وسى رەتتە باقىتجان ساعىنتايەۆ مەملەكەت باسشىسىنىڭ 5 الەۋمەتتىك باستاماسىن جۇزەگە اسىرۋعا جاۋاپتى بارلىق مەملەكەتتىك ورگاندارعا ناقتى تاپسىرمالار جۇكتەدى.
«سول سەبەپتى ۇلتتىق ەكونوميكا مينيسترلىگى مەملەكەتتىك ورگاندارمەن جانە ۇلتتىق بانكپەن بىرلەسىپ، ءبىر اپتا ىشىندە بەس باستامانى ىسكە اسىرۋ مەحانيزمدەرى مەن مەرزىمدەرىن جانە جاۋاپتى ورىنداۋشىلارىن كورسەتە وتىرىپ، ناقتى جول كارتاسىن ازىرلەسىن. كەلەسى ۇكىمەتتىڭ وتىرىسىندا، ياعني، 13 - ناۋرىزدا ءوز باعىتتارى بويىنشا جاۋاپتى ازاماتتاردى تىڭدايتىن بولامىز»، - دەگەن ۇكىمەت باسشىسى العا قويىلعان مىندەتتەردى ورىنداۋعا بىردەن كوشۋ قاجەتتىگىن باسا ايتتى.
اۆتور: مارلان جيەمباي
