كوتەرىڭكى كوڭىل كۇيدىڭ 5 قۇپياسى
ۇيقىنى قاندىرىڭىز! نەلىكتەن تاڭ اتىسىمەن اشۋلانىپ، باجىلداپ، توسەكتەن تۇرعىمىز كەلمەيدى؟ ۇيقىنىڭ قانباۋىنان كۇش ازايىپ، ۇنەمى شارشاپ جۇرەسىز. سوندىقتان تۇندە فيلم نەمەسە ۇيالى تەلەفون قاراۋدان باس تارتىپ، جىلدام ۇيىقتاۋعا تىرىسىڭىز. سول كەزدە جۇمىسقا قابىلەتىڭىز ارتىپ، جىلدام ءارى دۇرىس شەشىم قابىلداي الاتىنىڭىزدى بايقايسىز.
توسەكتەن تۇرعان سوڭ، وزىڭىزگە جاعىمدى ەموتسيا سىيلاڭىز. تەرەزەنى اشىپ، ءۇيدى جارىقتاندىرىڭىز. ەگەر دالا قاراڭعى بولسا، ەلەكتر جارىعىن قوسىڭىز. كۇلىمدەڭىز! قۋاتتانىڭىز! ءوزىڭىزدى حوش يىسپەن ەركىنسىتۋگە كەزەك كەلدى. دۋش قابىلداساڭىز، ۇناتاتىن گەلمەن جۋىنىڭىز. جۋىنۋدىڭ سوڭىندا سالقىن سۋمەن شايىنىڭىز. ول قۋانىش سەزىمىن قامتاماسىز ەتەتىن نەيرومەدياترلاردى جانداندىرادى.
پارابەنسىز جانە سۋلفاتسىز تابيعي كوسمەتيكا تاڭداڭىز. ول تەرىڭىزدى ءتيىمدى قورعايدى، ال بالعىن حوش ءيىس تاڭدى قۋانىشقا تولتىرادى.
جىگەرلەنىڭىز! قاجەتتى قالىپقا كەلۋ ءۇشىن بوس ۋاقىتىڭىزدى قولدانىڭىز. ماقالا وقيتىن مۇمكىندىگىڭىز بولسا، پوزيتيۆتى جاڭالىقتار، كۇلكىلى اڭگىمەلەر، قىزىقتى سۋرەتتەر جانە قاناتتى سوزدەر وقىڭىز. بىرنەشە مينۋت وقۋعا جۇمساعاننىڭ وزىندە كۇلكىڭىزدى ۇستاي المايتىنىڭىز انىق.
جاتتىعىڭىز! قارقىندى ءجۇرىس تە دەنساۋلىققا پايدالى. فيزيكالىق جاتتىعۋلار باقىت گورمونى ەندورفيننىڭ تۇزىلۋىنە اكەلەدى. جانىڭىز قالايتىن سپورت ءتۇرىن تاڭداڭىز. ول ۆەلوسيپەد تەبۋ، بيلەۋ نەمەسە ءجۇزۋ بولۋى مۇمكىن.
باستىسى جۇكتەمەنى رەتتە ۇستاڭىز. ول سىزگە قۋانىش سىيلاۋ كەرەك. ەگەر كۇندەلىكتى جاتتىعۋعا ۋاقىت بولماسا، قاراپايىم ءجۇرىستىڭ ءوزى جارايدى. جۇمىسقا نەمەسە ساباققا دەيىنگى جولدىڭ جارتىسىن قارقىندى جۇرىسكە ارناڭىز. قارقىندى ءجۇرىس ءسىزدى قۋاتتاندىرىپ، كوڭىل كۇيدى كوتەرەدى.
ءوزىڭىزدى ەركەلەتىڭىز! بوساڭسۋعا جانە دەمالۋعا جاقسى كۇتىم كومەكتەسەدى. تەرىڭىزدى نازىك تازارتۋشى قۇرالمەن تازارتىپ، كرەم جاعىڭىز. دۇرىس تاماقتانۋدى قولىڭىزعا الىڭىز. اينا الدىنا كەلىپ، ءوزىڭىزدى ماقتاڭىز. بۇل - ءسىزدىڭ سەنىمىڭىزدى ارتتىرادى.
Massaget.kz
