قىرعىزستانداعى ءىرى قوشقاردى قازاق كاسىپكەرلەرى 5 مىڭ دوللارعا ساتىپ الدى - فوتو
شۋ وبلىسى ماسكەۋ اۋدانى الەكساندروۆكا اۋىلىنىڭ 56 جاستاعى تۇرعىنى گيسسار تۇقىمدى قوي وسىرۋمەن اينالىسادى. ول كورابل اتتى قوشقاردى 5000 دوللارعا ساتقانىن ايتتى.
مۇحامەت ۇساق قارا مالدى رەكوردتىق باعاعا ساتتىم دەپ سانايدى. گيسسار تۇقىمدى قويدى وسىرۋمەن ول 18 جىلدان بەرى اينالىسىپ كەلەدى.
«قوجالىقتا تەك گيسسار تۇقىمدى قويلار عانا بار. 2000-جىلى تاجىكستاندا بولدىم، سوندا وسى تۇقىمدى ساتىپ الدىم. سودان بەرى ءار ەكى جىلدا تۇقىمدى جاقسارتۋ ءۇشىن قوشقارلاردى جاڭارتىپ وتىرامىن. قازىر مەندە 30 باس قوي بار. ءبىر ۇلكەن قوشقاردى ساتتىم، وعان كورابل دەگەن ەسىم دە بەردىم. ول قىرعىزستاندا عانا ەمەس، قازاقستان اۋماعىندا دا بەلگىلى. جوتاسىنىڭ بيىكتىگى 1 مەتر 8 سانتيمەتر، ۇزىندىعى 1 مەتر 50 سانتيمەتر، سالماعى 190 كەلى. وتكەن جىلى قازاق كاسىپكەرلەرىنە 5000 دوللارعا ساتقانمىن. كورابلدىڭ جاسى 7 دە. الداعى ۋاقىتتا كورابل سياقتى جاقسى تۇقىم العىم كەلەدى»، - دەدى فەرمەر.
ايتا كەتەرلىگى، مۇحامەت گيسسار تۇقىمىن باسقا تۇقىمدارمەن بۋدانداستىرۋمەن دە اينالىسادى.
