اتىراۋدا شارۋا قوجالىعى قولىنان ايىرىلعان قىزمەتكەرىنە 5 ميلليون تەڭگە تولەيدى
قۇرمانعازى اۋداندىق سوتىنا شارۋا قوجالىقتارىنىڭ ءبىرىنىڭ جۇمىسشىسى كەلىپ، جۇمىس بارىسىندا ءوزىنىڭ دەنساۋلىعىنا زيان كەلگەندىگىن جانە مورالدىق تۇرعىدا زارداپ شەككەندىگىن ايتىپ شاعىمدانعان. وزىنە كەلتىرىلگەن زيان ءۇشىن ول شارۋا قوجالىعى يەسىنەن وتەماقى رەتىندە 20 ميلليون تەڭگە ءوندىرىپ بەرۋدى سۇراعان.
قىزمەتكەر شاعىمىندا 2002 -جىلى قوجالىقتا ەلەكتريك بولىپ قىزمەت ەتكەندىگىن، سول ۋاقىتتا باسشىنىڭ تاپسىرماسىمەن ەلەكتر مونتاجداۋ جۇمىسىن جاساپ جاتقاندا، ونى توق سوققانىن جازعان. سونىڭ سالدارىنان ەر ادام ەكى قولىنان ايىرىلىپ، ءبىرىنشى توپتاعى مۇگەدەك بولىپ قالعان. بۇدان بۇرىن سوت ونىڭ پايداسىنا كاسىپورىننان ماتەريالدىق زالالدىڭ ورنىن تولتىرۋ ەسەبىنەن بەلگىلى ءبىر سوما ءوندىرىپ بەرگەن. سوت جۇمىسشىنىڭ شاعىمىن ءىشىنارا قاناعاتتاندىرىپ، ونىڭ پايداسىنا شارۋا قوجالىعىنان 5 ميلليون تەڭگە ءوندىرىپ بەردى. سوت شەشىمى زاڭدى كۇشىنە ەنگەن جوق.
