مەكسيكالىق بوكسشى ساۋل «كانەلونىڭ » گولوۆكيننەن 5 باسىمدىعى
بۇگىندە تانىمال باسىلىمدار مەن سپورت ساراپشىلارى قوس بوكسشى اراسىنداعى جەكپە- جەككە ءتۇرلى بولجامدار جاساۋدا. ءبىرىنىڭ ارتىقشىلىعىن باسا ايتسا، ءبىرىنىڭ شارشى الاڭداعى كەمشىلىگىن كورسەتۋدە. باستىسى - ءبىر- بىرىنە لايىقتى قارسىلاستاردىڭ جەكپە- جەگىن سپورتسۇيەر قاۋىم اسىعا كۇتىپ جۇرگەنى جاسىرىن ەمەس. گەننادي گولوۆكين مەن ساۋل الۆارەستىڭ جۇدىرىقتاسقاندا وزىندىك ارتىقشىلىقتارى بارى راس. ءبىرىنىڭ سوققىسى جويقىن بولسا، ءبىرى - جىلدام. وسى ورايدا شەتەلدىك باسىلىمدار جازىپ جۇرگەن "كانەلونىڭ" گولوۆكيننەن 5 باسىمدىعىن جازا كەتكەندى ءجون ساناپ وتىرمىز.
"كانەلو" گولوۆكيننەن 8 جاسقا كىشى
سپورتتا جاستىڭ دا ماڭىزدى فاكتور ەكەنى انىق. مەكسيكالىق بوكسشى گەنادان 8 جاسقا كىشى. وسىعان دەيىن باق- تا ساۋل الۆارەس قازاقستاندىق بوكسشىنىڭ جاسى ۇلعايعانىن كۇتىپ جۇرگەنى جايلى جازىلعان. ونىڭ راس، نە وتىرىك ەكەنى مەكسيكالىقتىڭ وزىنە عانا ايان. گەننادي گولوۆكيننىڭ سوڭعى جەكپە- جەكتەرىنە قاراپ، بوكسشىنىڭ شاۋ تارتقانى جايلى پىكىرلەر ايتىلا باستادى. راس تا شىعار. ءبىراق مەكسيكالىق بوكسشىمەن جەكپە- جەك وتكىزۋدىڭ ءبىر امالى بولۋى دا مۇمكىن. سەبەبى دەنيەل دجەيكوبسپەن بولاتىن جەكپە- جەك الدىندا وتانداسىمىزدىڭ جاتتىقتىرۋشىسى ابەل سانچەس "گەنناديي گولوۆكين ءوزىنىڭ كەيىنگى قارسىلاسىنا قورعانىستا ءوزىنىڭ وسال تۇستارى بار ەكەنىن كورسەتۋى كەرەك. سول كەزدە عانا وزگە قارسىلاستار كەزەكتى كەلىسىمشارتقا قول قويۋعا كەلىسەدى" - دەگەن بولاتىن.
"كانەلونىڭ" قورعانىسى مىقتى
ساۋل الۆارەس ءساتتى قورعانا بىلەتىن كاسىپقوي بوكسشىلاردىڭ ءبىرى. جەكپە- جەكتە وزىنە كوپ سوققى دارىتپايدى. قورعانا ءجۇرىپ، وڭتايى كەلگەندە شابۋىلداعاندى ءجون كورەدى. وسى ءبىر باسىمدىعى ارقىلى قارسىلاسىن شارشاتىپ الۋعا تىرىسادى. ال گەننادي گولوۆكين قورعانىستان گورى شابۋىلداعاندى جاقسى كورەدى. وتانداسىمىزعا "big show drama" جاساعان ۇنايدى. تاعى ءبىر ايتا كەتەتىنى، گەنانىڭ "كانەلوعا" قاراعاندا سوققىسى جويقىن.
مەكسيكالىقتىڭ جىلدامدىعى جوعارى
سپورت ساراپشىلارى ساۋل الۆارەستىڭ جىلدامدىعى گەنادان جوعارى دەپ باعالاۋدا. "Boxingnews24.com" ءتىلشىسى دجەفف اراناۋدىڭ ايتۋىنشا، مەكسيكالىققا قارسى جەكپە- جەكتە وتانداسىمىز جۇدىرىقتاسۋ مانەرىن وزگەرتكەنى دۇرىس ەكەن. - ءدال قازىرگى ۋاقىتتا "كانەلو" GGG- عا قاراعاندا الدەقايدا جىلدام. گەنناديدىڭ كۇشى 3-4 جىل بۇرىنعى قالپىندا بولعانمەن، جىلدامدىعى تومەندەپ بارادى. مەكسيكالىق جىلدامدىعى ارقىلى جەڭىسكە جەتۋى مۇمكىن. ەگەر گولوۆكين الۆارەستى جەڭگىسى كەلسە، جۇدىرىقتاسۋ مانەرىنە وزگەرىس ەنگىزۋى كەرەك. ونى جەڭۋدىڭ ءبىر جولى - شابۋىلعا ءبىرىنشى شىعىپ، جىلدام سوققىلارمەن ەس جيدىرماۋ. ونىڭ مانەرىندە جۇدىرىقتاسۋعا مويىنسۇنباۋ.
الۆارەستىڭ كاسىپقوي بوكستاعى تاجىريبەسى مول
مەكسيكالىق بوكسشى 6 -مامىر كۇنى وتانداسى حۋليو سەزار چاۆەسپەن جۇدىرىقتاسادى. بۇل - ونىڭ كاسىپقوي بوكستاعى 51- كەزدەسۋى. وسىعان دەيىن وتكىزگەن 50 جەكپە- جەگىنىڭ 48 دە قارسىلاستارىنان باسىم تۇسكەن. 2013 -جىلى امەريكالىق بوكسشى فلويد مەيۆەزەرگە (كىشىسى) ۇتىلسا، 1 جەكپە- جەگىندە قارسىلاسىمەن تەڭ تۇسكەن. كاسىپقوي بوكستاعى جەكپە- جەكتەر سانى بويىنشا الۆارەس گەنانىڭ الدىن وراپ تۇر. شەين موزلي، كەرميت سينترون، وستين تراۋت، فلويد مەيۆەزەر (كىشىسى) جانە امير حان سىندى بوكسشىلارمەن جۇدىرىقتاسقانى زور تاجىريبە بولعانى راس. ال گەننادي گولوۆكين اتاعىنان ات ۇركەتىن بوكسشىلارمەن جۇدىرىقتاسقان جوق. ونىڭ ءارتۇرلى سەبەپتەرى (سالماعى سايكەس كەلمەۋ، كەلىسىمشارت، ت. ب. ) دە بار. دەگەنمەن اۋەسقوي بوكستا 350 جەكپە- جەك وتكىزگەن وتانداسىمىزدىڭ تاجىريبەسى از دەپ ايتا المايمىز. الۆارەس اۋەسقوي بوكستا اتوي سالماعان بوكسشى.
الۆارەس قاشا ءجۇرىپ جۇدىرىقتاسادى
گەننادي گولوۆكين جاقىن قاشىقتىقتا جۇدىرىقتاسۋدىڭ حاس شەبەرى. ال مەكسيكالىق بوكسشى گەناعا قارسى قاشا ءجۇرىپ جۇدىرىقتاسۋدى جوسپارلايتىنى راس. ونى وسىعان دەيىنگى سۇحباتتارىندا دا ايتا كەتكەن بولاتىن. ال قاشا ءجۇرىپ جۇدىرىقتاسۋ - گەناعا ۇنامايدى. سوندىقتان دا ونىڭ جۇيكەسىنە جۇك ءتۇسىرىپ، تەز شارشاپ قالۋى دا ىقتيمال.
- مەن گولوۆكينگە قارسى جەكپە- جەكتە دجەيكوبس جاساعان ايلا- ءتاسىلدىڭ ەكى ەسەسىن كورسەتەمىن. GGG تەك شابۋىلداعاندى جاقسى كورەدى. قورعانۋدى بىلمەيدى. بارلىق قاشىقتىقتا جۇدىرىقتاسا المايدى. ول - وتە مىقتى ءارى كۇشتى بوكسشى. ءبىراق ول تەك جاقىن قاشىقتىقتا عانا جۇدىرىقتاسۋدى بىلەدى. وعان تۋرا قارسى تۇرار بولساڭ، ايامايتىنى راس. ال قاشا ءجۇرىپ جۇدىرىقتاسار بولساڭ، ول تۇك ىستەي المايدى. ونى جەڭۋدىڭ ءتۇرلى جولدارى بار.
ءيا، قوس بوكسشى اراسىنداعى جەكپە- جەك وتەر بولسا، بۇكىل سپورتسۇيەر قاۋىم نازارى اۋارى انىق. بۇگىن ءبىز مەكسيكالىق بوكسشىنىڭ باسىمدىقتارىن ايتا كەتتىك. الداعى ۋاقىتتا گەنانىڭ باسىمدىقتارى تۋرالى جازاتىن بولامىز.
Massaget.kz
