حالىقارالىق ارميا ويىندارى 5 مەملەكەت اۋماعىندا وتەدى

  بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا ق ر قورعانىس ءمينيسترىنىڭ ورىنباسارى، گەنەرال- مايور تالعات جانجۇمەنوۆ حابارلادى.

بيىل رەسەي، ق ح ر، قازاقستان، ازەربايجان جانە بەلارۋس سىندى 5 مەملەكەت اۋماعىندا 28 سايىس وتكىزۋ جوسپارلانعان. قازاقستاندىق اسكەري قىزمەتشىلەر باق سىنايتىن 11 سايىستىڭ تورتەۋى رەسەي اۋماعىندا وتەدى، ولار «تانك بياتلونى»، «اسكەري بارلاۋ ۇزدىكتەرى»، «ەلبرۋس شەڭبەرى» جانە «اسپان كىلتى» دەپ اتالادى.

 ق ح ر (قىتاي) اۋماعىنا قازاقستاندىق اسكەريلەر «قارۋ- جاراق شەبەرى» جانە «دەسانتتىق ۆزۆود» سايىستارىنا قاتىسادى. سونداي- اق، بەلارۋس ەلىندە «دوستاستىق جاۋىنگەرى»، ازەربايجان رەسپۋبليكاسىندا «تەڭىز كۋبوگى» سايىستارىنا بارۋ كوزدەلىپ وتىر. قازاقستان اۋماعىندا 29 - شىلدە 9-تامىز كۇندەرى «ارتيللەريادان وق اتۋ شەبەرى»، «مەرگەندەر شەبى» جانە «ۇ ۇ ا ەسەبىنىڭ سايىسى» اتتى ءۇش سايىس وتەدى.

 ق ر قورعانىس ءمينيسترىنىڭ ورىنباسارىنىڭ حابارلاۋىنشا، قازاقستاندىق كوماندالاردىڭ دايىندىق جۇمىستارى 15 - مامىردان كەيىن باستالادى. كوماندالار قۇرامىندا جالپى سانى 249 ادام بار. «مۇنداي اۋقىمدى سايىستارعا قاتىسۋ ءبىزدىڭ اسكەري قىزمەتشىلەرىمىزدىڭ جاۋىنگەرلىك شەبەرلىگىن شىڭداپ، كاسىبيلىگىن ارتتىرادى. جانە وسىنداي كونكۋرستاردى ەلىمىزدىڭ اۋماعىندا وتكىزۋ قارۋلى كۇشتەردىڭ جانە ەلىمىزدىڭ بەدەلىن تانىتىپ، حالىقارالىق دەڭگەيگە كوتەرەدى»، - دەدى گەنەرال- مايور تالعات جانجۇمەنوۆ.

اتاپ وتكەن ءجون، 2016 -جىلى ارمي ويىندارىندا قازاقستان كومانداسى جوعارى ناتيجەلەرگە قول جەتكىزدى. بىرنەشە سايىس تۇرلەرى بويىنشا العاش رەت قاتىسسا دا، قازاقستان قارۋلى كۇشتەرىنىڭ كومانداسى جەكە قۇرام سانى مەن سايىستارعا قاتىسۋ بويىنشا الدىڭعى ورىنداردان كورىندى.

 اۆتور: ايجان سەرىكجان قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى