ەكى اجەسىن باعىپ وتىرعان قىتايلىق 5 جاسار قىز جۇرتتىڭ جۇرەگىن ەلجىرەتتى - فوتو
اكەسى سوتتالىپ، اناسى ەكىنشى رەت تۇرمىسقا شىعىپ كەتكەن ەكەن.
بۇل تۋرالى The Daily Mail باسىلىمى حابارلايدى.
انا مەن بالا اراسىنداعى بايلانىستىڭ وتە جوعارى ەكەنىن ءبارىمىز جاقسى بىلەمىز. بەس جاسار اننا قىتايدىڭ وڭتۇستىك- باتىسىنداعى تسۋني ايماعىندا ەكى اجەسىمەن بىرگە تۇرىپ جاتىر. شەتەلدىك تىلشىلەردىڭ ءبىرى ونىڭ ءبىر كۇندىك ءومىرىن باقىلاپ قايتقان ەكەن. اننا نەبارى ءۇش ايلىق بولعاندا اكەسى تۇرمەگە قامالعان. وسىدان كەيىن ونىڭ اناسى ەكىنشى رەت تۇرمىسقا شىعىپ، ءسابيىن قايىن جۇرتىنىڭ قولىندا قالدىرادى. بۇگىندە اننا بۇل وتباسىنىڭ جالعىز بەرىك تىرەگىنە اينالعان.
بەس جاسار قىز ءۇشىن ەكى قارياعا قارايلاۋ - وڭاي شارۋا ەمەس. اننا كۇندەلىكتى ەرتە تۇرىپ ەكى اجەسىنە اس ازىرلەيدى.
ورىندىقتىڭ ۇستىنە شىعىپ، كوكونىستەردى قۋىرىپ، ءتۇرلى تاعام جاسايدى.
اننانىڭ اجەسى سوزىلمالى ارتريتكە شالدىققان. ەركىن ءجۇرىپ- تۇرۋعا قينالادى. كىشى اجەسىنىڭ دە جاعدايى ءماز ەمەس. ەكەۋى كۇنى بويى توسەكتە جاتادى ەكەن.
ءبۇلدىرشىن ولاردى دارەتحانا مەن قالاعان جەرلەرىنە جەتەكتەپ الىپ بارادى. مۇنىمەن قاتار، ءۇيدى ءوزى تازالاپ جۋىپ، قوقىستى دا ۋاقىتىلى شىعارىپ وتىرادى.
بۇگىندە كىشكەنە ءبۇلدىرشىن جۇرتتىڭ كوزايىمىنا اينالعان. ۇيلەرىندە ازىق- تۇلىك ءبىتىپ قالعان كەزدە، كورشىلەرى باقتا ءوسىپ تۇرعان كوكونىستەرىن بولىسەدى ەكەن.
«مەن ولارعا ءومىر بويى قامقورشى بولعىم كەلەدى»، - دەيدى اننا ءوزىن سۋرەتكە ءتۇسىرىپ جۇرگەن تىلشىگە.
