دزيۋدودان قازاقستاننىڭ 5 دۇركىن چەمپيونى وزىنە قول جۇمساپ، كوز جۇمدى
پاۆلودار وبلىستىق قىلمىستىق-اتقارۋ جۇيەسى دەپارتامەنتىنىڭ سوتتالعاندار اراسىنداعى تاربيە ءىسى جونىندەگى ءبولىمىنىڭ باسشىسى بوريس گاۆريليۋكتىڭ ايتۋىنشا، قايعىلى وقيعا كەشە تاڭعى ساعات جەتىلەر شاماسىندا بولعان.
«سوتتالعاننىڭ دەنەسىن تۇزەۋ مەكەمەسىنىڭ قىزمەتكەرى تاۋىپ الدى. ول موينىن شىنىمەن كەسىپ جىبەرگەن. بۇل فاكتىنى وبلىستىڭ ىشكى ىستەر ورگانى تىركەپ، سوتقا دەيىنگى تەرگەۋ امالدارىن جۇرگىزەدى. بۇعان دەيىن ايتىلعانداي، ونى تەرەزەدەن ەشكىم يتەرىپ جىبەرگەن جوق. سەبەبى، كولونيا ءبىر قاباتتى عيماراتتا ورنالاسقان. باقىتجان وتكەن جىلدىڭ 18- جەلتوقسانىنان بەرى جازاسىن وتەپ جاتقان بولاتىن»، - دەيدى بوريس گاۆريليۋك.
وڭىردەگى ءى ءى د وكىلدەرىنىڭ مالىمەتىنشە، بۇل فاكتى بويىنشا ق ر قىلمىستىق كودەكسىنىڭ 105-بابىمەن (ءوزىن-ءوزى ولتىرۋگە دەيىن جەتكىزۋ) سوتقا دەيىنگى تەرگەۋ باستالدى.
وزىنە-ءوزى قول جۇمساعان ازامات دزيۋدودان قازاقستاننىڭ بىرنەشە دۇركىن چەمپيونى، پاۆلودار وبلىستىق دزيۋدو فەدەراتسياسىنىڭ ۆيتسە-پرەزيدەنتى باقىتجان ابدىكارىموۆ بولىپ شىقتى. ول بىلتىر باياناۋىل اۋدانىنىڭ تۇرعىنىن جاراقاتتاعانى ءۇشىن 5 جىلعا باس بوستاندىعىنان ايرىلعان ەدى.
