استانادا ورالماندارعا جەر الىپ بەرەم دەپ الداعان الاياق ايەل 5 جىلعا سوتتالدى

قوياندىداعى ءبىر توپ شەتتەن كەلگەن اعايىنعا ارزان جەر اپەرەم دەپ الداپ، اقشالارىن جيناپ العان اياگوز شنەيدەرگە قاتىستى قىلمىستىق ءىس سارىارقا اۋداندىق سوتىندا جارتى جىلداي قارالدى.

ءىس باستالعالى بەرى ۇلتاراقتاي تەلىمنەن دامەلى اعايىندى تاقىرعا وتىرعىزىپ كەتكەن كەلىنشەك ءوزىن بەينەتاسپاعا تۇسىرۋگە تىيىم سالدى. ال ۇكىم تىڭداۋعا كەلگەن جابىرلەنۋشىلەرمەن سويلەسپەك تۇگىلى، بەتىن جاۋىپ الىپتى.

ۇستىنەن الاياقتىق بابى بويىنشا قىلمىستىق ءىس قوزعالعان شنەيدەردىڭ ايىبى سوت بارىسىندا دالەلدەنىپ، سۋديا وعان 4 جىل 8 اي جازا كەستى. جانە بۇرىن سوتتالىپ، وتەلمەي قالعان ەكى ايىن ۇستىنەن قوسىپ، شنەيدەر 5 جىلىن جالپى رەجيمدەگى اباقتىدا وتەيتىن بولدى.

سۋديا جالعىزباستى انانىڭ التى بالاسى بار ەكەنىن جانە جازاسىن اۋىرلاتاتىنداي فاكتىنىڭ جوقتىعىن ەسكەرىپ، بەس جىل كەستىك دەيدى. بۇعان قوسا، سوتتالۋشى ۇستىنەن ارىز تۇسىرگەن 54 ادامعا 150 مىڭ تەڭگەدەن 1 ميلليونعا دەيىن الداپ العان اقشاسىن ۇكىم كۇشىنە ەنگەن ءۇش كۇن ىشىندە ءوز ەركىمەن قايتارىپ بەرۋى ءتيىس.

الايدا، ارزان جەر ءۇشىن بانكتەن نەسيە الىپ، قارىزدانىپ، سوڭعى تيىنىن ساناپ بەرىپ، سان سوققان اعايىننىڭ اياگوزدىڭ ءۇش كۇن ىشىندە العان اقشاسىن قايتارىپ بەرەتىنىنە سەنىمى از. ويتكەنى، كەلىنشەكتىڭ اتىنا تىركەلگەن ەشقانداي دۇنيە-مۇلكى جوق كورىنەدى.

ونىڭ ۇستىنە، جابىرلەنۋشىلەر شنەيدەر قوياندىدا ەمىن-ەركىن ءبىر جىل ءجۇرىپ، ءار ادامعا 10 جۇزدىكتەن جەر ۇلەستىرگەندە كومەك بەرگەن سىبايلاستارىنىڭ سىتىلىپ كەتكەنىنە اشۋلى.

سوتتالعان اياگوز شنەيدەردىڭ ءوزى كەزىندە قازىق قاعىپ، ءبولىپ بەرگەن اۋماقتا موڭعوليا مەن قىتايدان كوشىپ كەلگەن 15 ورالمان وتباسى ءۇي تۇرعىزىپ العان. ارالارىندا، زاڭسىز باسپانالارىندا قىستاپ شىققاندار دا بار.

جەرگىلىكتى بيلىك ازىرگە ەشكىمنىڭ ءۇيىن كۇرەگەن جوق. ال ۇكىمدى وتە جەڭىل دەگەن ورالماندار قالالىق سوتقا شاعىم تۇسىرمەك. كۇن جىلىنسا اياگوز ءبولىپ بەرگەن جەرگە ءۇي سالۋدى باستايمىز دەپ وتىر.

31- كانال

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى