اتىراۋداعى ميالى قورعانىنان 560 جادىگەر تابىلدى
وبلىستىق تاريحي- ولكەتانۋ مۋزەيىنىڭ ديرەكتورى راشيدا حاريپوۆانىڭ ايتۋىنشا، ارنايى قۇرىلعان ارحەولوگيالىق توپ ءۇش قورعاندا قازبا جۇمىسىن ەكى اي بويى جۇرگىزگەن.
«بۇل قورعاندار ءبىزدىڭ زامانىمىزعا دەيىنگى Ⅱعاسىر مەن ءبىزدىڭ زامانىمىزدىڭ Ⅺعاسىرى ارالىعىن قامتيدى. بۇل قورعانداردى 2017 -جىلى وبلىستىق تاريحي- ولكەتانۋ مۋزەيى انىقتاعان ەدى. قورعاننىڭ جوعارعى قاباتى ح- Ⅺعاسىرلاردان، تومەنگى قاباتى ءبىزدىڭ زامانىمىزعا دەيىنگى Ⅱعاسىرداعى تەمىر داۋىرىنەن سىر شەرتەدى»، - دەدى مۋزەي ديرەكتورى راشيدا حاريپوۆا.
ونىڭ ايتۋىنشا، ءۇش قورعاندا جۇرگىزىلگەن قازبا جۇمىستارى كەزىندە 560 ءتۇرلى جادىگەر تابىلعان. ونىڭ ىشىندە التىن مەن كۇمىستەن سوعىلعان اشەكەي بۇيىمدار مەن ات ابزەلدەرى، قولادان سوعىلعان قارۋ- جاراقتىڭ، كەراميكالىق قۇمىرالار مەن قايشى دا بار. قابىردەگى ادام قاڭقاسىنىڭ جامباسىندا قادالىپ تۇرعان جەبە سىنىعى بولعان.
«بۇل ادامنىڭ سوعىستا قازا تاپقانىنىڭ بەلگىسى بولۋى مۇمكىن. ونى عۇن نەمەسە وعىز تايپاسىنىڭ وكىلى دەپ توپشىلاپ وتىرمىز. سەبەبى، قورعاننان تابىلعان مولا سول كۇيى ساقتالعان»، - دەيدى راشيدا حاريپوۆا.
ەندى وبلىستىق تاريحي- ولكەتانۋ مۋزەيىنىڭ قىزمەتكەرلەرى قۇرمانعازى اۋدانىندا كەزەكتى ارحەولوگيالىق قازبا جۇمىسىن جۇرگىزۋدى جوسپارلاپ وتىر. ەسكە سالا كەتەلىك، بۇدان بۇرىن اتىراۋدا سارماتتار داۋىرىندەگى التىن ايەل بەينەسىنىڭ ەسكيزى ۇسىنىلعان ەدى.
