ەسىرتكى تاسىمالداۋشىلارعا قورعان بولعان 55 پوليتسيا قىزمەتكەرى ۇستالعان

باس پروكۋرور قايرات قوجامجاروۆ قۇقىق قورعاۋ ورگاندارى ۇيلەستىرۋ كەڭەسىنىڭ وتىرىسىندا وسىنداي مالىمەت جاريالادى. سونداي- اق ول جۋىردا جۇرگىزىلگەن پروكۋرورلىق تەكسەرىستىڭ ناتيجەسىنە توقتالدى.

ماسەلەن، ەسىرتكى قىلمىسىنا قاتىستى قوزعالعان 1500 قىلمىستىق ءىس زاڭسىز توقتاتىلعان. ەلىمىزدە ەسىرتكىگە تاۋەلدى ازاماتتار ازاماي تۇر. ولاردىڭ جەكە ەمدەۋ ورتالىقتارىنا جۇگىنەتىندەرى تىركەۋگە الىنبايتىن كورىنەدى. ەسىرتكى ساتۋشىلاردى انىقتاۋ جۇمىستارى بىلتىر 15، ال بيىل 30 پروتسەنتكە تومەندەگەن.

 قايرات قوجامجاروۆ، قازاقستان رەسپۋبليكاسىنىڭ باس پروكۋرورى:

- سينتەتيكالىق ەسىرتكى زاتتارى ەلىمىزدە جاپپاي تارالىپ جاتىر. اسىرەسە ينتەرنەت- سايتتار ارقىلى ەمىن- ەركىن ساتىلادى. بۇل جامان ادەتكە كوبىنە جاستار -  جوعارى وقۋ ورىندارى مەن كوللەدج ستۋدەنتتەرى، مەكتەپ وقۋشىلارى ءۇيىر كەلەدى. الەۋمەتتىك جەلىلەردەن ەسىرتكىنىڭ ءتۇبى نەگە اپاراتىنىن كورىپ ءجۇرمىز. سوندىقتان ەسىرتكى اينالىمىن توقتاتۋ بويىنشا ۇگىت- ناسيحات جۇمىستارى پروفيلاكتيكالىق شارالار مەن وقۋ باعدارلامالارىندا ۇنەمى كورىنىس تابۋى ءتيىس. بۇل ماسەلەنىڭ وزەكتىلىگى مەملەكەت باسشىسى جاريالاعان جاستار جىلىندا ودان ءارى ارتا تۇسەدى. جيىن بارىسىندا باس پروكۋرور ەسىرتكى ساتۋشىلاردى انىقتاۋعا ارنالعان جۇمىستاردى كۇشەيتۋ كەرەك ەكەنىن اتاپ ءوتتى. سونداي- اق ەسىرتكى بيزنەسىمەن كۇرەسەتىن قۇرىلىمداردىڭ قىزمەتىن باعالاۋ جۇيەسىن قايتا قاراۋدى ۇسىندى. «شەكارا جانە كەدەندىك باقىلاۋ مەكەمەلەرى تىيىم سالىنعان زاتتاردىڭ تاراۋىنا توسقاۋىل بولۋى ءتيىس»، -  دەدى قايرات قوجامجاروۆ.

www.24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى