شىمكەنتتىك جاس جۇبايلار تىكۇشاقتى 550 مىڭ تەڭگەگە جالداعان
ءبىر ساعات بويى قىزمەت كورسەتكەن تىكۇشاق جەكەمەنشىك مۇناي گاز كومپانياسىنا تيەسىلى بولىپ شىقتى، دەپ حابارلايدى «قازاقپارات ح ا ا ءتىلشىسى.
كومپانيانىڭ اۆياتسيا دەپارتامەنتى جەتەكشىسى قۋانىش مۇسايەۆتىڭ سوزىنشە، جەكەمەنشىك مەكەمە كوممەرتسيالىق قىزمەت كورسەتۋگە جۋىردا عانا رۇقسات العان. ال جاس جۇبايلاردىڭ تاپسىرىسى العاشقىسى ەكەن.
«سوڭعى كەزدەرى قارجىلىق قيىندىقتار بولۋىنا بايلانىستى ءبىز كوممەرتسيالىق قىزمەت كورسەتۋ ءۇشىن رۇقسات العان بولاتىنبىز. ارنايى سايت اشىپ، جارناما دا بەرىپ قويدىق. ال، جاس جۇبايلاردىڭ تاپسىرىسى العاشقىسى ەدى. ءبىراق مۇنشالىقتى شۋ شىعادى دەپ ويلامادىق. ياعني، تويعا كەلگەن قوناقتار تىكۇشاقتى ءتۇسىرىپ، الەۋمەتتىك جەلىلەرگە تاراتىپ جىبەرىپتى. ەندى بىزگە سونىڭ كەسىرى ءتيىپ كەتۋى مۇمكىن»، - دەيدى قۋانىش مۇسايەۆ.
ەستەرىڭىزگە سالا كەتەيىك، كۇنى كەشە وڭتۇستىك وڭىرىندە توي كورتەجىمەن بىرگە ۇشقان تىكۇشاقتىڭ بەينەجازباسى بارلىق الەۋمەتتىك جەلىلەرگە تاراپ كەتكەن بولاتىن. تۇسىرىلىمدە توي كورتەجىمەن ىلەسىپ بارا جاتقان تىكۇشاق تومەن قاراي ءتۇسىپ، قايتا كوتەرىلگەن. اۋە كەمەسىنىڭ ۇشقىشتارى كورتەجدەن وزىپ كەتپەي ۇشۋعا تىرىسادى.
بۇگىن ءوڭىردىڭ جەرگىلىكتى پوليتسەيلەرى وسى جايت بويىنشا انىقتاۋ جۇمىستارىنا كىرىسكەن ەدى. كەيىننەن ۇيلەنىپ جاتقان ازامات ايتۋعان ەسىمدى سۋرەتشى ەكەنى بەلگىلى بولدى.
