قازاق مەملەكەتتىلىگىنىڭ 550 جىلدىعىنا ارنالعان باقىرلار شىعارۋ ۇسىنىلدى
«ەستەلىك داتانى مەرەكەلەۋگە دايىندىقتى بۇگىننەن باستاۋ كەرەك. الەمدىك تاجىريبە كوپتەگەن ەلدەر ءوز مەملەكەتتىلىگى قۇرمەتىنە ارنايى باقىرلار شىعارعانىن كورسەتەدى»، - دەپ جازدى بۇقاربايەۆ. ونىڭ پىكىرىنشە، «ەگەر ۇلتتىق بانك 2015-جىلى قازاق مەملەكەتتىلىگىنىڭ 550 جىلدىعىنا ارنالعان باقىرلاردى شىعارسا، بۇل سونداي باقىرلاردىڭ قاتارىن لايىقتى تۇردە تولتىرار ەدى». بۇقاربايەۆ پەن لۋكاشوۆ شاقالاردىڭ ديزاينىن ۇسىنىپ وتىر.
ۇلتتىق بانك باسشىسىنىڭ كەڭەسشىسى ولجاس قۇدايبەرگەنوۆ بۇل جونىندە: «مەن ينتەرنەت قولدانۋشىلارىنىڭ مەرەيتويلىق داتاعا ارنالعان باقىرلار دايىنداۋ تۋرالى ۇسىنىسىن باسشىلىققا جەتكىزەمىن. ۇسىنىستىڭ ماقۇلدانۋى كادىك، ءبىراق تەحنيكالىق جاعىنان وعان ءبىرشاما ۋاقىت كەتەدى»، - دەپ جاۋاپ بەردى.
«2013-جىلعى سەناري قايتالانباسا ەكەن دەيمىن، ول كەزدە ۇكىمەتتىڭ قاۋلىسىمەن رەسپۋبليكا بويىنشا ۇلى ساياساتكەر ابىلاي حاننىڭ 300 جىلدىعى جوعارى دەڭگەيدە تويلانۋى كەرەك بولدى، ءبىراق ءىس جۇزىندە مەرەكەلەۋ تۋرالى ەشتەڭە ەستىلگەن جوق، ايماقتىق سايتتاردىڭ بىرىندە كوكشەتاۋدا بۇل وقيعاعا وراي ات بايگەسى ۇيىمداستىرىلعانى تۋرالى جاڭالىق قانا پايدا بولدى»، - دەيدى بۇقاربايەۆ. بۇعان دەيىن ساياساتتانۋشىنىڭ وسى ماسەلە جونىندە ۇلتتىق بانككە ءوتىنىش جاساعانى حابارلانعان ەدى. ءبىراق ۇلتتىق بانك پوست قازان ايىنىڭ سوڭىندا جاريالانعانىن، ال باقىرلار شىعارۋدىڭ 2013-جىلعا ارنالعان جوسپارى ەرتەرەك ازىرلەنگەنىن ايتتى.
ايتا كەتەيىك، ق ر ۇلتتىق بانكى بۇعان دەيىن «جىلقى جىلى» دەگەن التىن جانە كۇمىس باقىرلار شىعارعان بولاتىن. ولار 12 قىرلى پىشىندە جاسالعان. باقىرلاردىڭ ەكەۋىنىڭ دە ەكى جاعىندا ءتيىستى بەينەلەرى بولدى. سونىمەن بىرگە، ەلدىڭ قارجى رەتتەۋشىسى مىس، نيكەل مەن مىرىشتىڭ قوسپاسىنان كومپوزيتور، پەداگوگ، قوعام قايراتكەرى مۇقان تولەبايەۆتىڭ 100 جىلدىعىنا ارنالعان باقىرلار دا شىعارعان ەدى.
