55 جاسقا تولعان شاحتەرلەرگە تولەنەتىن الەۋمەتتىك تولەمنىڭ سوماسى بەلگىلى بولدى
2024-جىلدان باستاپ زياندى ەڭبەك جاعدايىندا جۇمىس ىستەيتىن 37 مىڭ ادام ارنايى الەۋمەتتىك تولەم الادى. بۇل تۋرالى ەڭبەك جانە حالىقتى الەۋمەتتىك قورعاۋ ءبىرىنشى ۆيتسە-ءمينيسترى ءاقمادي سارباسوۆ ايتتى، دەپ حابارلايدى Kazinform.
«ورتاشا ەسەپپەن العاندا، ارنايى الەۋمەتتىك تولەم 200 مىڭ تەڭگەنى قۇراۋى مۇمكىن. ونىڭ قۇرامىندا ءتورت باعىتتان تولەنەتىن قاراجات قامتىلادى. ءبىز بۇعان دەيىن 1,5 شاماسىندا ەڭ تومەن كۇنكورىس دەڭگەيىن بەلگىلەگەن ەدىك. دەپۋتاتتار، ونى 2 ەڭ تومەن كۇنكورىس دەڭگەيىنە دەيىن جەتكىزۋدى ۇسىندى. بۇل رەتتە ءتورت قارجى كوزىنەن الىناتىن جالپى ارنايى الەۋمەتتىك تولەم 200 مىڭ تەڭگەدەن اسىپ ءتۇسۋى مۇمكىن»، - دەدى ا. سارباسوۆ پارلامەنت ماجىلىسىندە تىلشىلەر سۇراعىنا جاۋاپ بەرە وتىرىپ.
اتاپ ايتقاندا، ارنايى الەۋمەتتىك تولەم بىرنەشە كومپونەنتتەن تۇرادى جانە ءتورت قارجى كوزى قامتىلادى. بىرىنشىدەن، رەسپۋبليكالىق بيۋجەتتەن 1,5 شاماسىندا ەڭ تومەن كۇنكورىس دەڭگەيى مولشەرىندە ارنايى كاسىپتىك تولەم بار. ەكىنشىدەن، ب ج ز ق- دان مىندەتتى كاسىپتىك زەينەتاقى جارنالارى مەن جيناقتالعان زەينەتاقى جيناقتارىن ەسكەرە وتىرىپ، مىندەتتى زەينەتاقى جارنالارى ەسەبىنەن دە ىسكە اسىرىلادى. ۇشىنشىدەن، ءومىردى ساقتاندىرۋ جونىندەگى كومپانيالاردان 1 ەڭ تومەن كۇنكورىس دەڭگەيى مولشەرىندە ەسكەرىلەدى. تورتىنشىدەن، جۇمىس بەرۋشىلەردىڭ قاراجاتى ەسەبىنەن 1 ەڭ تومەن كۇنكورىس مولشەرىندە جۇزەگە اسىرىلادى.
«زياندى ەڭبەك جاعدايىندا جۇمىس ىستەيتىن ادام 55 جاسقا تولسا، ارنايى الەۋمەتتىك تولەمدى وسى ادامدار 63 جاسقا دەيىن الادى. كەيىن بۇل ازاماتتارعا زەينەتاقى تولەنەدى، ياعني ارنايى تولەم توقتايدى»، - دەدى ۆيتسە-مينيستر.
سونىمەن قاتار ول بۇل مۇمكىندىكتى پايدالانا الاتىن ادامداردىڭ سانىن ايتتى.
«55/7 كريتەرييلەرى بويىنشا (جۇمىسشى 55 جاسقا تولىپ، جەتى جىل ەڭبەك ءوتىلى بولۋى ءتيىس) قازىر بىزدە وسىنداي ادامدار جۇمىس ىستەيتىن 1400- گە جۋىق كاسىپورىن بار. 2024-جىلى بۇل قۇقىقتى 37 مىڭ ادام پايدالانا الادى، ياعني ولار زياندى ەڭبەك جاعدايىندا جۇمىس ىستەپ جاتىر. ەگەر سالالار بويىنشا ايتساق، وندا باسىم ۇلەسى تاۋ-كەن سەكتورى مەن وڭدەۋ ونەركاسىبىنە تيەسىلى»، - دەدى ا. سارباسوۆ.
