شەتەلدە ءبىلىم الۋعا باعىتتالعان «بولاشاق» ستيپەندياسى 544 ۇمىتكەرگە بەرىلدى

 «بيىل ەلىمىزدىڭ مەرەيلى مەرەكەسى تاۋەلسىزدىگىمىزدىڭ 25 جىلدىق مەرەيتويىن اتاپ وتۋگە ساناۋلى عانا كۇن قالدى. ايتۋلى مەرەكە شەڭبەرىندە مەملەكەت باسشىسىنىڭ جارلىعىمەن «25 جۇلدىزدى كۇن» بەلگىلەندى، ال وسى 7 - جەلتوقسان ەلىمىزدىڭ جارقىن بولاشاعى مەن جاستاردىڭ كەمەل كەلەشەگىنە ارنالعان. وتىرىسىمىزدىڭ وسى كۇن قارساڭىندا وتكىزىلۋىنىڭ وزىندىك ءمانى دە بار. ويتكەنى، «بولاشاق» باعدارلاماسى ەل دامۋىنا ەلەۋلى قوسىپ كەلەدى»، - دەدى مەملەكەتتىك حاتشى.

ونىڭ ايتۋىنشا، تاۋەلسىزدىك جىلدارى ىشىندە «بولاشاق» باعدارلاماسى ەلىمىزدىڭ جوعارى ساناتتى ماماندارىن دايىندايتىن الەمدىك جەتەكشى جوباعا اينالىپ وتىر. «وسى جىلدارى ىشىندەگى تابىستارىمىزعا شولۋ جاسار بولساق، 23 جىل بۇرىن ەلباسى نۇرسۇلتان نازاربايەۆتىڭ تىكەلەي باستاماسىمەن قۇرىلعان «بولاشاق» باعدارلاماسى بويىنشا بۇگىنگى كۇنگە دەيىن 9339 قازاقستاندىق بىلىمدەرىن ارتتىردى. بيىلعى جىلى كوميسسياعا ءبىرقاتار وزگەرىس ەنگىزىلدى. بۇل «بولاشاق» باعدارلاماسى ءارى قاراي ءتيىمدى جۇرگىزۋگە مۇمكىندىك بەرەدى»، - دەدى گ. ءابدىقالىقوۆا.

كوميسسيا وتىرىسى اياسىندا ءبىلىم جانە عىلىم ءمينيسترى ەرلان ساعاديەۆتىڭ شەت ەلدە كادرلار دايارلاۋ جونىندەگى رەسپۋبليكالىق كوميسسيانىڭ حاتتامالىق تاپسىرماسىنىڭ ورىندالۋى تۋرالى ەسەبى تىڭدالىپ، «بولاشاق» باعدارلاماسىن ىسكە اسىرۋعا قاتىستى ءبىرقاتار ماسەلەلەر قارالدى. سونىمەن قاتار كوميسسيا شەشىمىمەن ورتالىق جانە جەرگىلىكتى مەملەكەتتىك ورگانداردىڭ وتىنىمدەرى بويىنشا ازىرلەنگەن 2017 -جىلعا باسىم ماماندىقتار تىزبەسى بەكىتىلىپ، كەلەسى جىلعا ارنالعان ستيپەنديالاردىڭ شەكتى سانى انىقتالدى.

كوميسسيا شەشىمىمەن ستيپەنديا ماگيستراتۋاردا جانە دوكتورانتۋرادا وقيتىن، سونىمەن قاتار الەمنىڭ جەتەكشى عىلىمي جانە وندىرىستىك ورتالىقتارىندا تاعىلىمدامادان وتۋگە جىبەرىلەتىن 544 ۇمىتكەرگە تاعايىندالدى. وتىرىس قورىتىندىسى بويىنشا ق ر مەملەكەتتىك حاتشىسى «بولاشاق» حالىقارالىق ستيپەندياسىن ودان ارى ىسكە اسىرۋ بويىنشا ءبىرقاتار تاپسىرما بەردى.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى