ەسىرتكى بيزنەسىنە قارسى كۇرەسكە 53 ميلليارد تەڭگەدەن استام قارجى ءبولىندى
«قاسىم- جومارت توقايەۆ جاقىندا ۇكىمەت قابىلداعان ناشاقورلىق پەن ەسىرتكى بيزنەسىنە قارسى كەشەندى جوسپاردىڭ ماڭىزدىلىعىن اتاپ ءوتتى. قاۋىپسىزدىك كەڭەسىنە قۇجاتتىڭ ورىندالۋ بارىسىن باقىلاۋعا الۋدى تاپسىردى»، - دەدى سەرىك سۇلتانوۆ اپتالىق بريفينگتە.
كەشەندى جوسپاردىڭ نەگىزگى ماقساتى - اۆياتەحنيكا مەن پيلوتسىز ۇشۋ اپپاراتتارىن قولدانىپ، ادام از جۇرەتىن ۋچاسكەلەردە ەسىرتكىنىڭ قاۋىپتى تۇرلەرىنىڭ تارالۋ كانالدارىنا سۇرانىستى ازايتۋ جانە جولىن كەسۋ، جاسىرىن ەسىرتكى زەرتحانالارى مەن پلانتاتسيالاردى جويۋ بويىنشا جالپىۇلتتىق دەڭگەيدە شارالار قابىلداۋ.
«اسىرەسە جاستار مەن جاسوسپىرىمدەر اراسىندا ەسىرتكىگە تاۋەلدىلىكتى ەرتە انىقتاۋ، ەسىرتكى تۇتىنۋشىلاردىڭ ناقتى ەسەبىن جاساۋ كوزدەلگەن. سونداي- اق ۋاكىلەتتى ورگانداردى ماتەريالدىق- تەحنيكالىق جابدىقتاۋ جانە ۇيىمدىق- قۇقىقتىق مارتەبەسىن ارتتىرۋ قارالعان. ناشاقورلىقتىڭ الدىن الۋ جۇيەسىن جەتىلدىرۋگە، ناشاقورلىقتى ەمدەۋگە جانە ەسىرتكىگە تاۋەلدى ادامداردى وڭالتۋ جۇيەسىن دامىتۋعا، سونداي- اق ۆەدومستۆوارالىق ءوزارا ءىس- قيمىلدى كۇشەيتۋگە دە كوپ كوڭىل بولىنەدى. وسى ءىس- شارالاردى ىسكە اسىرۋعا بيۋدجەتتەن 53,1 ميلليارد تەڭگە ءبولۋ كوزدەلگەن»، - دەپ تولىقتىردى سەرىك سۇلتانوۆ.
