ب ق و: 53 كوشەگە ايتۋلى تۇلعالاردىڭ ەسىمدەرى بەرىلدى
وسى جۇمىستىڭ باسى-قاسىندا جۇرگەن بەلگىلى ايتىسكەر اقىن، قازاقستاننىڭ ەڭبەك سىڭىرگەن مادەنيەت قىزمەتكەرى شولپان قىدىرنيازوۆانىڭ ايتۋىنشا، كوشەنىڭ اتىن بەرۋ وڭاي ەمەس. بۇعان جەرگىلىكتى زيالى قاۋىم وكىلدەرى، بەلسەندى تۇرعىندار اتسالىستى. «كوكەمنىڭ اتىن كوشەمە...» دەپ، قولقا سالۋشىلار، جوعارى ورىندار ارقىلى «قۇدا تۇسۋشىلەر» دە بولماي قالعان جوق.
دەگەنمەن، وسىنىڭ ءبارىن ساراپتاي، سۇرىپتاي كەلە ءدۇيىم ەل تانيتىن ارداقتىلارعا باسىمدىق بەرىلدى. اتاپ ايتقاندا، «ارمان» شاعىن اۋدانى بويىنشا اكادەميك قانىش ساتبايەۆ، جازۋشى جۇسىپبەك ايماۋىتوۆپەن قاتار الاش قايراتكەرلەرى ءالىمحان ەرمەكوۆ، تولەگەن يمانعازيەۆ، داۋلەتشە كۇسەپقاليەۆ، ەسەنعالي قاسابولاتوۆ ءبىر-ءبىر كوشەنى يەمدەندى.
«بولاشاق» شاعىن اۋدانىنداعى كوشەنىڭ بىرىنە اتاقتى اقىن تولەگەن ايبەرگەنوۆتىڭ ەسىمى بەرىلدى. بۇل جەردە قاراقالپاقستاننان كوشىپ كەلگەن اقىن جەرلەستەرىنىڭ پىكىرى دە ەسكەرىلدى. سول سياقتى مۇندا ەندى ءجۇسىپ بالاسۇعىن، ناۋرىزباي باتىر، مۇستافا وزتۇرىك، بەرقايىر ءامانشيننىڭ اتى-جوندەرى اتويلاپ تۇراتىن بولادى.
«جاقسى اۋىل» شاعىن اۋدانىنداعى قوس كوشە ەلىمىزدەگى تۇڭعىش باسىلىمنىڭ ءبىرى - 1911 -جىلدان باستاپ جارىق كورگەن «قازاقستان» گازەتىنىڭ رەداكتورى ەلەۋسىن بۇيرين مەن 1917 -جىلى «ۇران» گازەتىن شىعارعان، سەگىز ءتىل بىلگەن عۇلاما عابدولعازيز مۇساعاليەۆتىڭ ەسىمدەرىن ەنشىلەدى.
«سارىتاۋ» شاعىن اۋدانىندا تۇرعىندار قازاقستان ءانۇرانى اۆتورلارىنىڭ ءبىرى، ۇلى اقىن جۇمەكەن ناجىمەدەنوۆ، اكادەميك، جازۋشى زەينوللا قابدولوۆ، سونداي-اق سۇلتان بەيبارىس، ءال-فارابي، كۇلتەگىن، جيەنبەت، شالكيىز، سىپىرا جىراۋلار، بالۋان شولاق، قاجىمۇقان، ءبىرجان سال، اقىن سارا، جولامان باتىر، كۇيشىلەر مامەن، قالي جانتىلەۋوۆ، تاتتىمبەت، قازانعاپ، وقاپ قابيعوجين، قازاق كۇرەسىنەن قازاقستاننىڭ تۇڭعىش ابسوليۋتتى چەمپيونى ەڭسەپ دوسقاليەۆ، سامبودان الەم چەمپيونى اسقار شايحيەۆتىڭ كوشەلەرىمەن جۇرەتىن بولادى.
«كەڭ دالادا» جيرەنشە شەشەن، تاتار اقىنى مۇسا جالەل، الاۋ، ۇشقىن، ءماشھۇر-ءجۇسىپ كوپەيەۆ كوشەلەرى ورنىقسا، «بالاۋسا» شاعىن اۋدانىنان باتىرلار ەسەت، جالاڭتوس، شولان، جۇمىر، قىلىش، راقىمجان قوشقاربايەۆ، قازاقتىڭ تۇڭعىش عالىمدارى شوقان ءۋاليحانوۆ پەن سالىق باباجانوۆ، ءانشى امىرە قاشاۋبايەۆ، مەملەكەت جانە قوعام قايراتكەرى، الماتى مەديتسينا ينستيتۋتىنىڭ تۇڭعىش رەكتورى سانجار اسفەندياروۆ، الاش تۋىن كوتەرۋشىلەر بيجان جانقاداموۆ، الپىسباي قالمەنوۆ، كارىم جالەنوۆ، نۇعىمان زالييەۆتىڭ ورامدارىن تابۋعا بولادى. مۇنىڭ ءبارىن كەلتىرىپ وتىرعان سەبەپ، كەزدەيسوق ەنىپ كەتكەن ەسىم جوقتىعىنا كوز جەتكىزۋ.
اۆتور: ەلجان ەرالى
