قاراعاندىدا وتەتىن «ايبىن» اسكەري- پاتريوتتىق جيىنىنا 52 بويجەتكەن قاتىسادى - فوتو
ق ر قورعانىس مينيسترلىگىنىڭ باسپا ءسوز قىزمەتىنىڭ حابارلاۋىنشا، اتالعان جيىنعا اسكەري- پاتريوتتىق كلۋبتاردىڭ، رەسپۋبليكالىق (وبلىستىق) مەكتەپ- ينتەرناتتاردىڭ تاربيەلەنۋشىلەرى، جوعارعى وقۋ ورىندارىنداعى اسكەري كافەدرالاردىڭ ستۋدەنتتەرى قاتىسادى.
بيىلعى جىلى وسى ءىس- شاراعا العاش رەت جوعارى وقۋ ورىندارىنىڭ اسكەري كافەدرالارىنان 52 قىز بالا قاتىسادى. قازاقستاننىڭ بارلىق ايماعىنان شاراعا 800-دەن اسا ادام قاتىسادى دەپ جوسپارلانىپ وتىر. اتالعان جيىن بارىسىندا اسكەري- قولدانبالى سپورت ءتۇرى جانە جاۋىنگەرلىك دايارلىق، اسكەريلەندىرىلگەن ويىندار، سونداي- اق ينتەللەكتۋالدىق بايقاۋلار مەن باسقا دا جارىستار وتەدى.
بيىل اسكەري- پاتريوتتىق جيىننىڭ باعدارلاماسىنا جاڭا وزگەرىستەر ەنگىزىلدى. وتكەن جىلمەن سالىستىرعاندا اسكەري- سپورت ءتۇرى بويىنشا جارىستار سانى ەكى ەسەگە ازايدى. سونىمەن قاتار جاس بۋىننىڭ زياتكەرلىك جانە ينتەللەكتۋالدىق قابىلەتىنە ەرەكشە نازار اۋدارىلاتىن بولادى. قاتىسۋشىلار وزدەرىنىڭ دەنە ماشىقتارىن تولىق كورسەتۋى قاجەت.
اسكەري- پاتريوتتىق جيىندا «مەنىڭ روبوتىم» بايقاۋى بويىنشا ءار توپ روبوت ۇلگىلەرى مەن روبوتتالعان جۇيەنىڭ ۇلگىلەرىن، سونداي- اق ۇشۋ اپپاراتتارىنىڭ جوبالارىن كورسەتەدى.
«ايبىن» جيىنىنا قاتىسۋشىلار ەلىمىزدەگى تانىمال تۇلعالارمەن تانىسا وتىرىپ ەلىمىزدىڭ قالىپتاسۋى تۋرالى قىسقا مەتراجدى فيلمدەر فەستيۆالىندە ءوز تالاناتتارىن كورسەتە الادى. بۇدان وزگە، كورسەتىلىم ساباقتارىندا قارۋ- جاراق، اسكەري تەحنيكا مەن جابدىقتار، «ارلان» ، «نوماد» بروندى ترانسپورتەرلەرى، كوماندالىق- شتابتىق ماشينالاردىڭ جاڭا ۇلگىلەرى كورسەتىلەدى.
