قازاقستان ەكسپورتىنىڭ 51 پايىزىن شيكى مۇناي مەن مۇناي ونىمدەرى قۇراپ وتىر

بۇل تۋرالى ق ر پارلامەنتى سەناتى ءتوراعاسىنىڭ ورىنباسارى نۇرلان ءابدىروۆ ايتتى، دەپ حابارلايدى قازاقپارات ءتىلشىسى.

«مەملەكەت ەكسپورتقا باعدارلانعان كاسىپورىندارعا 20-عا جۋىق قارجىلىق جانە قارجىلىق ەمەس قولداۋ ءىس- شارالارىن كورسەتۋدە. ىشكى نارىقتى وتاندىق تاۋارلارمەن مولىقتىرۋ جانە ءبىزدىڭ تاۋار وندىرۋشىلەرىمىز ءۇشىن قولايلى جاعدايلاردى قامتاماسىز ەتۋ ماقساتىندا ۇكىمەت ۇلتتىق تاۋار وتكىزۋ جۇيەسىن قۇرۋ بويىنشا بەلسەندى جۇمىس جۇرگىزۋدە، ونىڭ شەڭبەرىندە وڭىرلەردە كوتەرمە- تاراتۋ ورتالىقتارى جەلىسىن قۇرۋ كوزدەلگەن. بۇل ءوز كەزەگىندە الەۋمەتتىك ماڭىزى بار ازىق- تۇلىك تاۋارلارىنىڭ باعاسىن تۇراقتاندىرۋعا وڭ اسەر ەتۋى ءتيىس»، - دەدى ول سەناتتا ءوتىپ جاتقان ۇكىمەت ساعاتىندا.

وسى رەتتە سەنات ءتوراعاسىنىڭ ورىنباسارى سالاداعى وڭ ۇردىسكە قاراماستان شەشۋدى تالاپ ەتەتىن ءبىرقاتار جۇيەلى پروبلەما ورىن الىپ وتىرعانىن ايتتى.

«بىرىنشىدەن، كولەڭكەلى ساۋدا ەلەۋلى ۇلەسكە يە بولىپ كەلەدى. ساراپشىلاردىڭ پىكىرىنشە، كولەڭكەلى ساۋدا جالپى ساۋدا كولەمىنىڭ جارتىسىنا جۋىعىن قۇرايدى. ەكىنشىدەن، قازاقستاندىق ەكسپورتتىڭ نەگىزىن بۇرىنعىداي وتىن- ەنەرگەتيكا تاۋارلارى، ال يمپورتتى جوعارى دەڭگەيدە قايتا وڭدەۋ تاۋارلارى قۇراپ وتىر. قازاقستاننىڭ باستى ەكسپورتتىق تاۋارى - اقشالاي بالامادا ەكسپورتتىڭ جالپى كولەمىنىڭ 51,5 پايىزىن الاتىن شيكى مۇناي مەن مۇناي ونىمدەرى. يمپورتتى كوبىنەسە وڭدەلگەن ونىمدەر، دايىن ازىق- تۇلىك تاۋارلارى قۇرايدى. ماشينالار، جابدىقتار، كولىك قۇرالدارى يمپورت قۇرىلىمىنىڭ 41 پايىزىن الادى. قازاقستاننىڭ ەكسپورتى تۋرالى ايتاتىن بولساق، ەكسپورتتىڭ تاۋارلىق ءارتاراپتاندىرىلۋى ايتارلىقتاي تومەن دەڭگەيدە قالىپ وتىرعانىن اتاپ وتكەن ءجون»، - دەدى نۇرلان ءابدىروۆ.

ونىڭ اتاپ وتۋىنشە، ەلىمىزدىڭ ەكسپورتىنىڭ 50 پايىزى قىتاي، يتاليا، رەسەي جانە نيدەرلاندىعا تيەسىلى بولىپ وتىر. وسىلايشا، قازاقستاندىق ەكسپورتتىڭ ساناۋلى ەلدەر توبىمەن شەكتەلگەندىگى بايقالادى. بۇل رەتتە يمپورتتىڭ 62 پايىزى ەكى ەلگە - رەسەيگە جانە قىتايعا تيەسىلى»، - دەدى سەنات ءتوراعاسىنىڭ ورىنباسارى.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى