قىتايداعى جازعى وليمپيادا ويىندارىنا قازاقستاندىق 51 سپورتشى اتتانادى

ولار سپورتتىڭ 21 تۇرىنەن باقتارىن سىنايدى. بۇل تۋرالى بۇگىن الماتىدا سپورتشىلاردى جارىسقا شىعارىپ سالۋعا ارنالعان باسپا ءسوز ءماسليحاتىندا قۇراما كوماندانىڭ شەف- دەميسسيونى مالىك ساپاشيەۆ مالىمدەدى.

«سينگاپۋردە وتكەن ءبىرىنشى وليمپيادا ويىندارىنا قازاقستان اتىنان 47 سپورتشى قاتىسقان بولاتىن. ولار سپورتتىڭ 20 تۇرىنەن 33 ليتسەنزيانى جەڭىپ الدى. قازاقستان 200 قاتىسۋشى ەلدىڭ ىشىنەن 24 ورىنعا يە بولدى. بۇل جاقسى ناتيجە. كوماندا بيىل دا جوعارى دەڭگەيدە ونەر كورسەتەدى دەگەن سەنىمدەمىن»، - دەدى م. ساپاشيەۆ.

ونىڭ ايتۋىنشا، ءبىزدىڭ سپورتشىلار قىتايعا بۇگىن كەشكە ۇشادى. بيىلعى وليمپيادا ويىندارىنا الەمنىڭ 170 ەلىنەن كەلگەن 3500 سپورتشى قاتىسادى. سپورتتىڭ 26 تۇرىنەن 184 مەدال جيىنتىعى ساراپقا سالىنادى. وليمپيادانىڭ اشىلۋ سالتاناتى 16 تامىز كۇنى وتەدى.

بوكستان الەم جانە ازيا چەمپيونى، «ازيانىڭ ۇزدىك بوكسشىسى» ابىلايحان ءجۇسىپوۆ ءوز پىكىرىمەن ءبولىستى.

«وليمپيادا ويىندارىنىڭ اشىلۋ سالتاناتىندا ۇلتتىق تۋىمىزدى ۇستاپ ءجۇرۋ ماعان سەنىپ تاپسىرىلدى. بۇعان وتە قۋانىشتىمىن. جانكۇيەرلەردىڭ ءۇمىتىن اقتاپ، ەلگە جاقسى ناتيجەمەن كەلەمىز دەپ سەنەمىن. سپورتشىلاردىڭ دەڭگەيى جوعارى»، - دەدى ول.

2000 - جىلعى سيدنەي وليمپياداسىنىڭ چەمپيونى، 1996- جىلعى وليمپيادا ويىندارىنىڭ، 1997 جانە 1999 - جىلعى الەم بىرىنشىلىكتەرىنىڭ جۇلدەگەرى ەرماحان يبرايموۆ ۇلتتىق قۇراماعا ساتتىلىك تىلەدى.

«بيىل ەلىمىزدىڭ مىقتى بوكسشىلارى ەل نامىسىن قورعايتىن بولادى. سپورتشىلاردىڭ بارلىعىنا ساتتىلىك تىلەيمىن. ءوز باسىم تۋ ۇستاۋشى بوكسەر ابىلايحان جۇسىپوۆكە جانە باسقا دا سپورت تۇرلەرىنەن ونەر كورسەتەتىن سپورتشىلاردىڭ بارلىعىنا جانكۇيەر بولامىن»، - دەدى اتاقتى بوكسشى.

اۆتور: جاپپاربەرگەن ايبوتا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى