قىتاي مەن ا ق ش-تا اۋا تەمپەراتۋراسى 50 گرادۋستان استى

بۇدان بولەك، ەۋروپانىڭ وڭتۇستىگىندە، سونداي-اق ا ق ش پەن قىتايدا اۋا تەمپەراتۋراسى سەلسي بويىنشا 50 گرادۋستان جوعارى كوتەرىلدى، دەپ حابارلايدى قازاقپارات BBC-گە سىلتەمە جاساپ.

سينوپتيكتەر تەمپەراتۋرا اپتانىڭ ورتاسىنا دەيىن كوتەرىلەدى دەپ سانايدى.

بولجامعا سايكەس، سارسەنبىگە قاراي يتالياداعى ساردينيا ارالىنىڭ وڭتۇستىگىندە اۋانىڭ تەمپەراتۋراسى 46 گرادۋس بولادى، ال قۇرلىقتىق يتاليانىڭ وڭتۇستىگىندە ەڭ جوعارى تەمپەراتۋرا - 43 گرادۋس.

سوڭعى بولجامعا سايكەس، يسپانيانىڭ وڭتۇستىگىندە ماكسيمالدى تەمپەراتۋرا 46 گرادۋس، ال فرانسيانىڭ وڭتۇستىگىندە – 40 گرادۋس جەتەدى.

ا ق ش-تىڭ وڭتۇستىك- باتىسىندا دا اپتاپ ىستىق بولادى. مەتەورولوگتار 38 قالادا تەمپەراتۋرا رەكوردى جاڭارۋى مۇمكىن دەپ ەسكەرتتى.

ۇلتتىق مەتەورولوگيا قىزمەتىنىڭ مالىمەتىنشە، جەكسەنبىدە لاس- ۆەگاستا (نەۆادا شتاتى) تەمپەراتۋرا 46,6 گرادۋسقا جەتتى.

اريزونا شتاتىنىڭ فەنيكس قالاسىندا اۋا تەمپەراتۋراسىنىڭ رەكوردتىق 47,2 گرادۋس دەيىن كوتەرىلەتىنى بولجانىپ وتىر.

جەكسەنبىدە ەڭ جوعارى تەمپەراتۋرا كاليفورنياداعى ءولىم القابىندا تىركەلگەن. عالامشارداعى ەڭ جىلى جەرلەردىڭ بىرىندە 53,9 گرادۋس ىستىق بولدى.

ماماندار جىلۋ تولقىنىنىڭ باستى پروبلەماسى كۇندىزگى اۋا تەمپەراتۋراسىنىڭ جوعارىلاۋىندا ەمەس، تۇندە جەتكىلىكتى تۇردە تومەندەمەيتىنىندە دەپ سانايدى.

جاقىن ارادا، اريزوناداعى تۇنگى تەمپەراتۋرا 32 گرادۋستان تومەندەمەيدى دەپ بولجانىپ وتىر.

بريتاندىق مەتەورولوگيالىق ورتالىقتىڭ مالىمەتىنشە، جەكسەنبىدە قىتايدا ەل تاريحىنداعى ەڭ جوعارى تەمپەراتۋرا تىركەلدى - شىڭجاڭ پروۆينتسياسىندا تەرمومەتر باعاناسى 52,2 گرادۋس دەيىن كوتەرىلدى.

وڭتۇستىك كورەيادا اۋا رايىنىڭ كۇرت وزگەرۋىنەن نوسەر جاۋىن جاۋىپ، كوشكىن مەن سۋ تاسقىنىنا ۇلاستى، ال جاپونيادا كەم دەگەندە 60 ادامعا ىستىق ءوتتى.

جاپون ارالدارىنداعى رەكوردتىق تەمپەراتۋرا (41,1 گرادۋس) 2018 -جىلى كۋماگايا قالاسىندا تىركەلگەن. بيىلعى جازدا الدىڭعى رەكورد جاڭارۋى ابدەن مۇمكىن.

ب ۇ ۇ-نىڭ مامانداندىرىلعان بولىمشەسى - دۇنيەجۇزىلىك مەتەورولوگيالىق ۇيىم جەرورتا تەڭىزى ايماعىندا قالىپتاسقان جىلۋ اعىمداعى اپتانىڭ ورتاسىنا قاراي كۇشەيىپ، تامىز ايىندا جالعاساتىنىن ەسكەرتتى.

كەلەسى اپتادا ماروككودا تەمپەراتۋرا 49 گرادۋس دەيىن كوتەرىلۋى مۇمكىن.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى