جاستارى ءجيى توبەلەسەتىن ساعىز اۋىلىندا 50 بەينەكامەرا ورناتىلادى
ساعىز - قىزىلقوعا اۋدانىنداعى ءىرى اۋىلدىق وكرۋگتىڭ ءبىرى. وكرۋگتە 8211 تۇرعىن بار. مۇندا 3 مەكتەپ، قىزىلقوعا اگرارلىق- تەحنيكالىق كوللەدجى، 2 بالاباقشا، 1 دارىگەرلىك امبۋلاتوريا، مادەنيەت ءۇيى جۇمىس ىستەيدى.
وكرۋگ تۇرعىندارىمەن كەزدەسكەن وبلىس اكىمى سەرىك شاپكەنوۆتىڭ ايتۋىنشا، اۋىل ورتاسىمەن اعىپ وتەتىن نوعايتى وزەنىنىڭ ۇستىنەن ەكى كوپىر سالىنادى. ونىڭ ءبىرىنىڭ قۇرىلىسىن ماۋسىمدا باستاۋ كوزدەلگەن. ال، ەكىنشى كوپىردىڭ جوبالىق- سمەتالىق قۇجاتتاماسىن جاساۋ جوسپارلانعان.
«قازىر ساعىز اۋىلىندا «اۋىل - ەل بەسىگى» باعدارلاماسىمەن جاڭا سپورت كەشەنى سالىنىپ جاتىر. بىلتىر باستالعان قۇرىلىس جۇمىستارى الداعى تامىزدا اياقتالۋى ءتيىس. الايدا، مەردىگەر «SCS ينجينيرينگ» ج ش س جۇمىستى مەزگىلىنەن كەشىكتىرىپ وتىر. قازىر نىساننىڭ قۇرىلىسى %33 عا اياقتالعان. سول سەبەپتەن، قۇرىلىستى تەزدەتۋدى، ال جاۋاپتى باسشىلارعا جۇمىستى قاتاڭ قاداعالاۋدى تاپسىردىم. ەگەر ءبىر جارىم ايدىڭ ىشىندە بۇل جۇمىس ءتيىستى ناتيجەسىن بەرمەسە، مەردىگەر مەكەمەمەن اراداعى كەلىسىمشارت بۇزىلادى»، - دەدى سەرىك شاپكەنوۆ.
اۋىلعا اۋىز سۋ «كەرەگەن- ساعىز- جامانسور» توپتىق سۋ قۇبىرىنان الىنادى. تاۋلىگىنە 2400 تەكشە مەتر سۋ ايدايتىن مۇنارا ورناتىلعان. ىلدي بەتكەيدەگى مۇنارا 700 تەكشە مەتر سۋ ايداپ تۇر. سول سەبەپتەن، قوسىمشا 2 سۋ قويماسىن، اۋىلىشىلىك جەلى مەن بيىك جەردەن سۋ مۇناراسىن سالۋ جوسپارلانعان.
«ساعىز اۋىلىندا قاۋىپسىزدىك پەن قوعامدىق ءتارتىپتى قامتاماسىز ەتۋ ءۇشىن بيىل 50 بەينەباقىلاۋ كامەراسى ورناتىلادى. پوليتسيا بولىمشەسىنىڭ جاڭا عيماراتىن سالۋ جوسپارلاندى. اۋىل تۇرعىندارىنىڭ يگىلىگى ءۇشىن ينفراقۇرىلىمدى دامىتىپ، الەۋمەتتىك نىسانداردى كوپتەپ سالۋعا كوڭىل ءبولىپ وتىرمىز. كەلەر جىلى «جايلى مەكتەپ» پيلوتتىق جوباسىمەن 600 ورىندىق مەكتەپتىڭ قۇرىلىسىن باستالادى»، - دەدى سەرىك شاپكەنوۆ.
ەسكە سالا كەتەلىك، بۇدان بۇرىن اتىراۋ وبلىسىندا اۋىل جاستارىنىڭ اراسىندا اتىس بولعانىن، جاراقات العان ءبىر ادام اۋرۋحانادا كوز جۇمعانىن جازعان ەدىك. كەيىن القابيلەر وسى قىلمىسقا قاتىسى 21 ادامنىڭ قىلمىستىق ىسىنە شەشىم شىعاردى.
