پەتروپاۆلدا ساياجاي قوعامىنداعى ۇيلەردىڭ بىرىنەن 50 دەن استام ەلىكتىڭ ەتى تابىلدى
ولاردىڭ كولىگىنەن جانە ساياجاي قوعامىنداعى ۇيلەردىڭ بىرىنەن باس- سيراعى مەن تەرىسى جانە ەكەۋىنىڭ تۇتاس ەتى تابىلدى، دەپ حابارلايدى قازاقپارات ءتىلشىسى.
سولتۇستىك قازاقستان وبلىسى پوليسيا دەپارتامەنتى باسپا ءسوز قىزمەتىنىڭ مالىمەتىنشە، ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى وبلىستىق پوليتسيا ۆەدومستۆوسىنىڭ باسقا بولىمشەلەرىمەن بىرلەسىپ، اسا ءىرى مولشەردە زاڭسىز اڭ اۋلادى دەگەن كۇدىكپەن پەتروپاۆلدىڭ ءۇش تۇرعىنىن ۇستادى.
ۇيىمداسقان قىلمىسقا قارسى كۇرەس باسقارماسىنا پەتروپاۆل تۇرعىندارىنىڭ بىرىندە تىركەلمەگەن قارۋدىڭ بولۋى مۇمكىن ەكەندىگى تۋرالى اقپارات تۇسەدى.
27-اقپاندا تاڭەرتەڭ «چەليابى- ءنوۆوسىبىر» تاسجولىنىڭ 525 شاقىرىمىندا تەكسەرۋ بارىسىندا پوليتسيا قىزمەتكەرلەرى 28 جاستاعى پەتروپاۆل تۇرعىنىنىڭ باسقارۋىنداعى «ۆاز-2115» اۆتوكولىگىن توقتاتتى. سالوندا 29 جانە 30 جاستاعى تاعى ەكى وبلىس ورتالىعىنىڭ تۇرعىنى بولعان. اۆتوكولىكتىڭ جۇكسالعىشىن قاراۋ كەزىندە سويىلماعان 4 ءسىبىر ەلىگى، سونداي- اق «توز» ماركالى ەكى تىركەلمەگەن تەگىس ۇڭعىلى مىلتىق، 2 پاترون، گيلزا جانە باسقا دا اڭشىلىق قۇرال- جابدىقتار تابىلىپ، تاركىلەندى.
«بۇدان ءارى ءىس- شارالاردى وتكىزۋ بارىسىندا پەتروپاۆلداعى ساياجاي قوعامدارىنىڭ بىرىندەگى ۇيدەن ەكى ەلىكتىڭ مۇشەلەنبەگەن ەتى، 41 ەلىكتىڭ تەرىسى، 119 تۇياق، 12 اڭنىڭ باسى تابىلدى. بۇل فاكت ق ر قىلمىستىق كودەكسىنىڭ 337-بابىنىڭ 3-بولىگى «زاڭسىز اڭشىلىق» بويىنشا سوتقا دەيىنگى تەرگەپ- تەكسەرۋلەردىڭ ءبىرىڭعاي تىزىلىمىنە ەنگىزىلدى. تاركىلەنگەن قارۋ مەن اڭداردىڭ سيراق- باسى، تەرىسى مەن ەتى ساراپتاماعا جىبەرىلدى. كۇدىكتىلەر پەتروپاۆل قالالىق پوليتسيا باسقارماسىنىڭ ۋاقىتشا ۇستاۋ يزولياتورىنا قامالدى»، - دەيدى س ق و پ د ۇيىمداسقان قىلمىسقا قارسى كۇرەس باسقارماسىنىڭ باستىعى جاندوس باسىبايەۆ.
ۇستالعاندار ەندى زاڭسىز اڭشىلىق ءۇشىن 5 مىڭ ا ە ك مولشەرىندە ايىپپۇل تولەۋى نەمەسە 5 -جىلعا دەيىن باس بوستاندىعىنان ايىرىلۋى نەمەسە قوعامدىق جۇمىستارعا 1200 ساعاتقا جەگىلۋى مۇمكىن.
