تەحنيكالىق جانە كاسىپتىك بىلىمگە مەملەكەتتىك تاپسىرىس 50 مىڭعا ارتادى
تولىعىراق وقۋ-اعارتۋ ءبىرىنشى ۆيتسە-ءمينيسترى شولپان كارينوۆا ايتىپ بەردى، دەپ حابارلايدى قازاقپارات ءتىلشىسى.
«مەملەكەت باسشىسى تاپسىرماسىنا سايكەس سۇرانىسقا يە ماماندىقتار بويىنشا تەگىن تەحنيكالىق جانە كاسىپتىك بىلىممەن %100 قامتۋ جۇمىسى جالعاسىپ جاتىر. بۇل ورايدا، ءبىزدىڭ مينيسترلىك 9 سىنىپتان كەيىن كوللەدجگە تۇسۋشىلەرگە مەملەكەتتىك تاپسىرىستى ۇلعايتۋ باعىتىندا جەرگىلىكتى اكىمدىكتەرمەن بىرلەسىپ ارەكەت ەتەدى. وسىلايشا، بيىل مەملەكەتتىك تاپسىرىس 50 مىڭ ورىنعا ارتادى»، - دەدى شولپان كارينوۆا و ك ق- دە وتكەن بريفينگىدە.
ونىڭ ايتۋىنشا، ء«بىلىم تۋرالى» زاڭعا وزگەرتۋلەر مەن تولىقتىرۋلار ەنگىزىلىپ، كوللەدجدەرگە قابىلداۋ كۆوتاسى قايتا قارالدى.
«ايتار بولساق، كوپبالالى وتباسى بالالارىنا %5، تولىق ەمەس وتباسى بالالارىنا %1، مۇمكىندىگى شەكتەۋلى بالالارى بار وتباسى بالالارىنا %1 گرانت بولىنەدى. تەگىن تەحنيكالىق جانە كاسىپتىك بىلىممەن ەڭ الدىمەن، الەۋمەتتىك وسال وتباسىلاردىڭ بالالارى قامتىلادى»، - دەيدى ول.
سونىمەن قاتار، سپيكەر مەملەكەتتىك تاپسىرىس ارقىلى تەحنيكالىق ماماندىقتار بويىنشا كادرلار دايارلاۋدىڭ ارتقانىن ايتتى.
«مەتاللۋرگيا، IT، قۇرىلىس، ينجەنەريا، قىزمەت كورسەتۋ سالالارىنا باسىمدىق بەرىلەدى. قازىرگى ۋاقىتتا تەحنيكالىق ماماندىقتار بويىنشا قابىلدانعان ستۋدەنتتەردىڭ ۇلەسى - 50 پايىز، ياعني 61 مىڭ ستۋدەنت»، - دەدى ش. كارينوۆا.
