سولتۇستىك ايماققا كوشەتىندەرگە 50 پايىزدىق تۇرعىن ءۇي سەرتيفيكاتى بەرىلەدى
بۇل تۋرالى ق ر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا «Qazaqstan» ۇلتتىق تەلەارناسىنا بەرگەن سۇحبات بارىسىندا مالىمدەدى، دەپ حابارلايدى قازاقپارات ءتىلشىسى.
«وڭىرلەردى دامىتۋعا ارنالعان ۇلتتىق جوبا اياسىندا ەلىمىزدىڭ سولتۇستىك وڭىرلەرىندە تۇرۋعا نيەتتى تۇرعىنداردى كوشىرۋ جۇمىسى جالعاسىپ جاتىر. جالپى تۇرعىنداردى سولتۇستىك ايماقتارعا كوشىرۋ ماسەلەسى ونداعى جۇمىس كۇشىنىڭ تاپشىلىعىمەن دە بايلانىستى. ءبىزدىڭ ەندىگى ماقسات - ازاماتتاردى كوشىرىپ قانا قويماي، ولارعا جۇمىس تاۋىپ بەرۋ. مەن جۋىردا س ق و- دا بولىپ، وبلىس اكىمى جانە بيزنەس وكىلدەرىنىڭ قاتىسۋىمەن سەمينار وتكىزدىك. سوندا بيزنەس وكىلدەرى بىزگە جۇمىس ورىندارىن اشۋعا مۇمكىندىك جاساڭىزدار دەگەن ءوتىنىش ءبىلدىردى. وسى ورايدا س ق و اكىمشىلىگى ارنايى باعدارلامانى ىسكە قوسپاق بولىپ وتىر. سول ارقىلى بيزنەس وكىلدەرى مەن كاسىپكەرلەردىڭ جاڭا جۇمىس ورىندارىن اشۋعا مۇمكىندىك بەرىلمەك»، - دەدى تامارا دۇيسەنوۆا تىكەلەي ەفير بارىسىندا.
مينيستر كەلتىرگەن مالىمەتكە سايكەس، اتالعان ايماقتا بيزنەستى دامىتۋعا رەسپۋبليكالىق جانە جەرگىلىكتى بيۋجەتتەن 20 ميلليارد تەڭگە قاراستىرىلىپ وتىر.
«سونىمەن قاتار ازاماتتاردى باسپانامەن قامتۋ دا ماڭىزدى. كەلەسى جىلعا ءبىز جاڭا جوبا قاراستىرىپ جاتىرمىز. تۇرعىن ءۇي باعاسىنىڭ 50 پايىزىن قارجىلاي سەرتيفيكات رەتىندە بەرۋ. ول قارجىعا تۇرعىن ءۇيدى سالىپ الادى ما نەمەسە «وتباسى بانكىنە» اپارىپ العاشقى جارنا رەتىندە قولدانا ما ونى ءار ادام ءوزى بىلەدى. سولتۇستىك وڭىرلەردە وسىعان دەيىن پايدالانۋعا بەرىلگەن تۇرعىن ۇيلەردىڭ ساپاسىنا قاتىستى سىن بار. سوندىقتان دا 50 پايىزدىق سەرتيفيكاتتى ءار ازاماتتىڭ وزىنە بەرۋ قاراستىرىلىپ وتىر»، - دەيدى ول.
ۆەدومستۆو باسشىسىنىڭ ايتۋىنشا، تۇرعىن ءۇي الۋعا بەرىلەتىن قارجىنىڭ ماقساتتى جۇمسالۋىن باقىلاۋ ءۇشىن ازاماتپەن كەلىسىمشارت جاسالاتىنىن ايتتى.
ەگەر ازامات باسپانا الۋعا بەرىلگەن اقشانى ماقساتسىز جۇمساسا، وندا قارجىنى تۇگەلدەي مەملەكەتكە قايتارۋعا مىندەتتى.
سونداي-اق، ەفير بارىسىندا ەڭبەك ءمينيسترى تامارا دۇيسەنوۆا ايەلدەردىڭ 58 جاستان زەينەتكە شىعۋىنا قاتىستى پىكىر ءبىلدىردى.
