وقۋشىلار اراسىنداعى «تۇلپار ءمىنىپ، تۋ العان» بايقاۋىنا 50 مىڭ وقۋشى قاتىسادى
بۇل تۋرالى «حابار» ارناسىنداعى «اشىق ديالوگ» باعدارلاماسىندا قوناق بولعان ق ر اقپارات جانە كوممۋنيكاتسيالار ءمينيسترى داۋرەن ابايەۆ ايتىپ بەردى، دەپ حابارلايدى قازاقپارات ءتىلشىسى.
«بۇل اۋقىمدى ءارى اعارتۋشى جوبا. ول جوباعا ءبىز ەلىمىزدىڭ بارلىق وڭىرلەرىنەن 50 مىڭنان استام وقۋشىنى تارتۋدى جوسپارلاپ وتىرمىز. ونىڭ ماعىناسى - وقۋشىلار قازاقتىڭ «قوبىلاندى باتىر» ەپوسىن جاتتاپ قانا قويماي، ونى تالقىلاپ، قازاقتىڭ ەرتەدەگى سوزدەرىنە تۇسىنىك بەرە الۋى كەرەك. بۇل بايقاۋدى جاستار جىلىنا ارناپ وتىرمىز. قوعامنىڭ كەڭ نازارىنا يە بولار دەگەن سەنىمىمىز بار. جوبانىڭ فينالدىق كەزەڭى - «حابار» تەلەارناسىندا تەلەكۇندەلىك جانە گالا-كونسەرت فورماتىندا وتەدى. بۇل رەتتە مەن وسى جوبانى قولداۋعا دايىن وتىرعان وبلىس اكىمدىكتەرىنە، الماتى مەن استانا، شىمكەنت قالاسىنىڭ اكىمدىگىنە، ءبىلىم جانە عىلىم مينيسترلىگىنە ەرەكشە العىسىمدى بىلدىرگىم كەلەدى»، - دەيدى داۋرەن ابايەۆ.
ءمينيستردىڭ ايتۋىنشا، الەمدە مۇنداي وقۋلار كوپتەگەن ەلدەردە ءوتىپ جاتادى.
«ماسەلەن، اعىلشىن ءتىلدى ەلدەردە «شەكسپير» وقۋلارى ءوتىپ جاتادى. ول از دەسەڭىز، رەسەيدە «پۋشكين» وقۋلارى وتكىزىلەدى. بارلىق جەردە ماقسات بىرەۋ - ءوسىپ كەلە جاتقان جاس بۋىنعا تۋعان ءتىلىمىزدىڭ بايلىعى مەن كوركەمدىگىن، ءبىزدىڭ بابالاردىڭ پوەتيكالىق مۇراسىنىڭ كوركەمدىگىن كورسەتۋ»، - دەدى مينيستر.
ەسكە سالا كەتسەك، بۇعان دەيىن قازاقستاندا مەكتەپ وقۋشىلارى اراسىنداعى «تۇلپار ءمىنىپ، تۋ العان!» بايقاۋى وتەتىنى حابارلانعان ەدى. نەگىزگى ماقسات - جاستاردى «الپامىس»، «ەر تارعىن»، «قوبىلاندى باتىر» جىرلارى سىندى حالقىمىزدىڭ باي مۇراسى نەگىزىندە تاربيەلەۋ.
بايقاۋ 6-10-سىنىپ وقۋشىلارى اراسىندا ۇيىمداستىرىلادى. وسى جولى «قوبىلاندى باتىر» جىرىنىڭ ماراباي جىراۋ نۇسقاسىن جاتقا ايتۋ قاجەت. بايقاۋعا رەسپۋبليكا بويىنشا 5000 مەكتەپتەن 50000 وقۋشى قاتىسادى دەگەن جوسپار بار. ءار مەكتەپتەن 10 وقۋشى (6-سىنىپتان 2 وقۋشى، 7-سىنىپتان 2 وقۋشى، 8-سىنىپتان 2 وقۋشى، 9-سىنىپتان 2 وقۋشى جانە 10-سىنىپتان 2 وقۋشى) قاتىسا الادى.
جوبا ءۇش كەزەڭنەن - اۋداندىق، وبلىستىق جانە رەسپۋبليكالىق ىرىكتەۋدەن تۇرادى. اۋداندىق كەزەڭدە 1-ورىن ءۇشىن 150000 تەڭگە، 2-ورىن - 100000 تەڭگە، 3-ورىنعا 50000 تەڭگە قاراستىرىلعان. ال وبلىستىق كەزەڭدە 1-ورىن ءۇشىن 1000000 تەڭگە، 2-ورىن - 600000 تەڭگە، 3-ورىن العاندارعا 300000 تەڭگە تابىستالادى. قازىرگى كەزدە رەسپۋبليكالىق ىرىكتەۋدىڭ قارجىلاي قورى پىسىقتالىپ جاتىر.
